टुरिन (एजेनसी)-इटालियन सिरी ए साविकको विजेता युभेन्ट्सको लिगमा आफ्नो अपराजित यात्रा कायमै राखेको छ । आफ्नो छैठैं खेलमा बोलोग्नालाई २-० ले पराजित गर्दै आफ्नो अपराजित यात्रा कायमै राखेको हो ।
खेलको ११ औं मिनेटमा पाउलो डिबालाले गोल गर्दै युभेन्ट्सलाई अग्रता दिलाएका थिए । उनले गोलरक्षकले बचाउ गरेको बल रिबाउन्डमा आएपछि गोल गर्दै अग्रता दिलाएका थिए । त्यसको पाँच मिनेटपछि क्रिस्टियानो रोनाल्डोको पासमा ब्लेस माटुइडीले गोल गर्दै युभेलाई २-० ले अगाडी पुर्याए । युभेले थप अवसर सिर्जना गरेपनि गोल थप्न भने सकेन ।
पछिल्ला सात सिजन लिग उपाधिमा कब्जा जमाएको टुरीन टोलीले यसपटक पनि सोहि लयलाई कायम राख्ने संकेत दिएको छ । खेलभर दबाब बनाएको युभेन्ट्स कुनै समय पनि दबाबमा रहेन । ७७ प्रतिशत बल पोसेसन राखेको टोलीले प्रहार गरेको १५ सटमध्ये ८ प्रहार गोलतर्फ लागेका थिए ।
लिगको अन्य खेलमा नेपोलीले पार्मालाई ३-० ले पराजित गर्दै युभेलाई पछ्याउने क्रम जारी राख्यो । नेपोलीको ६ खेलमा १५ अंक रहेको छ । लाजियोले उडीनेजेलाई २-१ ले हराउँदै १२ अंकसहित तेस्रो स्थानमा छ ।
एएस रोमाले फ्रोसीनोनेलाई ४-० ले पराजित गर्दै लिगको दोस्रो जित दर्ता गर्न सफल रहयो । काग्लीयारी र साम्पडोरीयाको खेल गोलरहित बराबरीमा टुंगियो । जेनोआले किएभोलाई २-० ले हरायो ।
प्रकाशित: Dec 31, 2017| 18:23 आइतबार, पुस १६, २०७४