नवलपरासी- एसिड प्रहारबाट रौतहटकी १८ वर्षे युवती सम्झना दासको ज्यान गएको घटना नसेलाउँदै नवलपरासीको कावासोतीमा फेरि एक युवतीमाथि एसिड र छुरा प्रहार भएको छ । कावासोतीकी २७ वर्षीया बसन्ती परियारमाथी एसिड र छुरा प्रहार भएको हो ।
बसन्तीलार्इ उनकै छिमेकी विमल श्रीपालीले एसिड र छुरा प्रहार गरेका हुन् । साँझ तरकारी किनेर घर फर्कँदै गरेकी उनलार्इ बाटोमा नै छुरा र एसिड प्रहार भएको थियो ।
एसिड प्रहारबाट घाइते भएकी उनको चितवनको भरतपुर अस्पतालमा उपचार भइरहेको छ । उनको २५ प्रतिशत शरीर जलेको छ ।
उनलार्इ एसिड प्रहार गर्ने श्रीपालीलार्इ प्रहरीले पक्राउ गरेको नवलपुरका प्रहरी प्रमुख एसपी रमेश थापाले नेपाल समयलार्इ जानकारी दिए ।
यस्तो थियो घटना
श्रीपाली र परियारबीच विगत लामो समयदेखि प्रेम सम्बन्ध रहेपनि दुवै विवाहित हुन् । बेग्ला बेग्लै पारिवारिक पृष्ठभूमिका भएपनि उनीहरुको दैनिक भेटघाट हुने गरेको थियो ।
उनीहरुबीच पछिल्लो समय उत्पन्न मनमुटावले यो घटना निम्त्याएको हुनसक्ने प्रहरीको अनुमान छ । आइतबार साँझ सब्जी किन्न गएकी परियार साँझ घर फर्कनेक्रममा श्रीपालीले एसिड र छुरा प्रहार गरेका थिए ।
एसिड र छुरा प्रहारपछि गम्भीर घाइते बनेकी उनलाई तत्काल चितवनस्थित भरतपुर अस्पतालको आइसीयूमा भर्ना गरी उपचार थालिएको छ । उनको अर्धचेत अवस्थामै उपचार भइरहेको छ ।
प्रकाशित: Dec 31, 2017| 18:23 आइतबार, पुस १६, २०७४