युभेनट्सको जितमा रोनाल्डोको गोल

टुरीन (एजेनसी)-सिरी ‘ए’ अन्तर्गत आइतबार राति भएको खेलमा फ्रोसिनोनेलाई पराजित गर्दै युभेन्ट्सले आफ्नो अपराजित यात्रालाई निरन्तरता दिएको छ । युभेन्ट्सले फ्रोसिनोनेलाई २-० ले पराजित गर्दै आफ्नो अपाजित यात्रालाई निरनतरता दिएको हो । 

युभेन्टसको जितमा सुपरस्टार क्रिस्टियानो रोनाल्डो र फेडरिको बर्नार्डेस्कीले समान एक एक गोल गरे । फ्रोसिनोनेको घरेलु मैदानमा भएको प्रतिस्पर्धात्मक खेलमा दुवै गोल दोस्रो हाफमा भएको थियो । 

खेलको ८१औं मिनेटमा रोनाल्डोले गोल गर्दै युभेन्टसलाई १-० को अग्रता दिलाए । मिरालेम प्यानिचको प्रहारलाई गोलरक्षकले बचाएपनि रिबाउन्डमा आएको बललाई पोर्चुगलका कप्तान रोनाल्डोले गोल गर्न सफल भएका थिए । सिरी ‘ए’ मा रोनाल्डोको यो तेस्रो गोल हो । रोनाल्डोले यसअघि सासुओलोविरुद्धको खेलमा २ गोल गरेका थिए ।

यद्यपी गोल भने विवादको घेरामा नै रहयो । टेलिभिजन रिप्लेमा हेर्दा रोनाल्डो अफसाइड पोजिसनमा रहेको देखिएपनि लाइन्सम्यानले झन्डा उठाएनन् । इटालियन लिगमा भीएआर प्रयोग गर्ने सुविधा भएपनि रेफ्रीले त्यसको प्रयोग गरेनन् । 

एक गोल गरेसँगै उच्च मनोवलमा रहेको युभेन्टसका लागि फेडरिकोले इन्जुरी समयमा थप एक गोल गर्दै २-० को जित दिलाए । पछिल्ला ७ सिजन लिग उपाधि जितेको युभेन्ट्स यस सिजन पनि सुरुआती खेलबाट नै लिगमा अग्रतामा छ ।