बारामा एकको हत्या, धनुषामा हत्या प्रयास

जनकपुरधाम- पछिल्लो केहि दिनयता प्रदेश २ मा अपराधको घटनामा वृद्धि भएको देखिएको छ । खास गरेर प्रदेश २ को धनुषा, सिरहा, बारा लगायतका जिल्लाहरुमा आपराधिक घटनाहरु वृद्धि भएको हो ।

आइतबार बारामा एक महिलाको घाटी रेटेर हत्या भएको छ । बाराको कलैया उपमहानगरपालिका–१३ बलिरामपुरकी ४५ वर्षीया सियापती धोबिन बैठाको घाटी रेटेर हत्या भएको हो । घर नजिकै आफ्नै खेतमा आइतबार बिहान सियापतिको शव घाटी रेटेर हत्या गरिएको अवस्थामा फेला परेको हो । सियापतिका श्रीमान् दुई वर्षदेखि परिवारबाट सम्पर्क बिहीन अवस्थामा रहेको बताइएको छ । 

शनिबार अपरान्ह घाँस काट्न गएकी सियापतीको शव २५ वर्षीय छोराले फेला पारेपछि प्रहरीलाई खबर गरेका थिए । घरमा सियापती र उनका छोरा उमेश बैठा मात्रै बस्दै आएका छन् । आमा निस्केको केहि बेरपछि बाख्रा चराउन उमेश पनि निस्किएका थिए । आमा खेतबाट नफर्किएपछि उमेशले छिमेकीलाई खबर गरेका थिए ।

उमेशले खबर गरेपछि घटनास्थमा पुगेको प्रहरीले सियापतिको घाटीमा धारिलो हतियारले रेटेको अवस्थामा शव फेला पारेको प्रहरी नायव उपरीक्षक रन्जितसिंह राठौरले बताए । घटनाबारे थप अनुसन्धान भइरहेको प्रहरीले जनाएको छ ।

धनुषामा घाटी रेटेर हत्याको प्रयास

यता धनुषामा घाटी रेटेर एक युवकको हत्या गर्ने प्रयास भएको छ । अपरिचित व्यक्तिको आक्रमणमा परि धनुषाको धनुषाधाम नगरपालिका-१ मुंगराहा बस्ने ३० वर्षीय शिवकुमार दास अपरिचित व्यक्तिको आक्रमणमा परी गंभीर घाइते भएका छन् ।

अपरिचित व्यक्तिहरुले दासको रुद्र घाटीमा धारिलो हतियारले रेटेको प्रहरीले जनाएको छ । गएराति ३ बजेतर्फ दासमाथि आक्रम भएको इलाका प्रहरी कार्यालय धनुषाधामले जनाएको छ ।

ज्यामीको काम गर्दै आएका दास पछिल्लो ३/४ दिनदेखि घर बाहिर रहेको र गएराति अचानक घाइते अवस्थामा घर पुगेको परिवारका सदस्यलाई उदृत गर्दै प्रहरीले जनायो । प्रहरीले जनाए अनुसार दास कामको सिलसिलामा धनुषाधाम नगरपालिका-३ सिकियाही पुगेका थिए । दासमाथि कसले र कहाँ आक्रमण गरेको खुल्न नसकेको प्रहरीको भनाइ छ ।

खुनले लतपत भएर घाइते अवस्थामा घर पुगेको दासलाई परिवारका सदस्यले उपचारको लागि जनकपुर अञ्चल अस्पाल पुर्‍याएका थिए । तर, जनकपुरमा उपचार संभव हुन नसकेपछि दासलाई बाहिर रेफर गरिएको अस्पतालले जनाएको छ । घटनाको विषयमा थप अनुसन्धान भइरहेको प्रहरीले जनाएको छ ।