सुपर ४ मा भारतको सुखद सुरुवात

बठमाडौं-एसिया कप क्रिकेट अन्तरगत सुपर ४ चरणको पहिलो खेलमा भारतले बंगलादेशलाई ७ विकेटले पराजित गरेको छ । बंगलादेशले प्रस्तुत गरेको १ सय ७४ रनको लक्ष्य भारतले ३७ औं ओभरमा प्राप्त गरेको थियो ।

भारतका लागि कार्यवाहक कप्तान एवं ओपनर रोहित शर्माले नटआउट १ सय ४ बलको सामना गर्दै ५ चौका र ३ छक्काको मद्दतमा ८३ रनको योगदान दिए । रोहितले शिखर धवनसँग मिलेर सुरुआती विकेटका लागि ६१ रनको साझेदारी गरेका थिए ।

धवनले ४७ बल खेल्दै ४ चौका र १ छक्कासहित ४० रन बनाए । अम्बाटि रायुडूले १३ रन र महेन्द्रसिंह धोनीले ३३ रनको योगदान दिए । बंगलादेशका लागि मसरफे मोर्ताजा, शकिब अल हसन र रुबेल हुसेनले १-१ विकेट लिए ।

पहिले ब्याटिङ गरेको बंगलादेशले ५० औं ओभरमा सबै विकेट गुमाउदै १ सय ७३ रन जोडेको थियो । ओपनरद्धय लिटन दास र नज्मुल हुसेन सान्टो ७–७ रनमा आउट भएका थिए । 

शकिब अल हसन १७, मुश्फिकर रहिम २१ रन र मोहमद मिथुनले ९ रनमात्र जोडे । त्यस्तै महामुदुल्लाहले २५ तथा मोसदेकले १२ रनको योगदान दिए । भारतका लागि स्पिनर रविन्द्र जडेजाले उत्कृष्ट प्रदर्शन गरे । 

उनले ४ विकेट लिने क्रममा २९ रनमात्र खर्चे । खेलको म्यान अफ द म्याच उनी नै भए ।