कलिङ भिसामा माल्दिभ्स पुगेकी संगिताको मृत्यु

झापा- झापाको मेचीनगर नगरपालिका-१० घर भएकी २४ वर्षीया संगिता राजवंशीको मालदिभ्समा मृत्यु भएको छ। 

वैदेशिक रोजगारीका लागि घरेलु कामदारका रुपमा कलिङ भिसाबाट श्रम अनुमति लिएर मालदिभ्स जानुभएकी उहाँको गत भदौ २५ गते मृत्यु भएको बुबा नकुल राजवंशीले जानकारी दिए। 

संगिताको शव आज बिहान घर ल्याइ पुर्‍याइएपछि स्थानीय रामघाटमा दाहसंस्कार गरिएको छ। सङ्गीताको मृत्यु आत्महत्याका कारण भएको भनी त्यहाँबाट खबर आएको मृतककी मामा राजकुमार राजवंशीले बताए। 

मालदिभ्स्बाट श्रीलङ्काको कोलम्बो हुँदै संगिताको शव शुक्रबार साँझ काठमाडौँ विमानस्थलमा ल्याइएको थियो। अविवाहित संगिता डेढ वर्षअघि वैदेशिक रोजगारीका लागि मालदिभ्स गएकी थिइन्।