पहिचान भएका हत्यारा अझै पक्राउ परेनन्

जनकपुरधाम–महोत्तरीको औरही नगरपालिका–१ का सन्तोष चौधरीकी ८ महिने छोरी सोनालिका चौधरीको हत्या भएको एक महिना भयो । तर, उनको हत्यामा संलग्न पक्राउ परेका छैनन । यद्यपी हत्याराको भने पहिचान भइसकेको बताइएको छ ।

सीसीटीभी फुटेजमा सोनालिका अपहरण गर्ने व्यक्ति स्पष्ट रुपमा चिनिएका छन् । सोनालिकाको अपहरण गर्ने व्यक्तिको पहिचान तथा ठेगाना खुलिसक्दासमेत पक्राउ गर्न नसकेपछि प्रहरीको अनुसन्धानलाई पीडित परिवार तथा स्थानीयबासीले आशंकाको दृष्टिले हेर्न थालेका छन् । 

औरही बजारमा सन्तोषको किराना पसल छ । १० भदौमा सोनालिका आफ्नी आमासँगै थिइन् । त्यसैदिन साँझ पसलमा पुगेका एकजना व्यक्तिले खेलाउने बहानामा सोनालीलाई आफ्नो काँखमा लिए । र, खेलाउँदै त्यहाँबाट सोनालीलाई बाकेर निस्केको पसलकै सीसीटीभी फुटेजमा देखिन्छ । अपहरण भएको भोलीपल्ट ११ भदौमा सोनालीको शव गाउँभन्दा पूर्व एक खेतमा स्थानीयबासीले फेला पारेका थिए ।

सीसीटीभीमा देखिएका ती व्यक्ति महोत्तरी भंगहा सीतापुर–६ जमुनियाका २५ वर्षीय भरत साह हुन्् । सीसीटभीमा स्पष्ट चिनिने भरतलाई प्रहरीले अझै पक्राउ गर्न सकेको छैन् ।

सोनालिका अपहरण गर्ने व्यक्तिको पहिचान भइसक्दा पनि पक्राउ नपरेपछि प्रहरीमाथि प्रश्न उठि रहेकोबेला महोत्तरीका प्रहरी प्रमुख एसपी ईश्वर कार्कीले भने आफूहरु इमान्दारीपूर्वक भरतको खोजी गरिरहेको बताउँछन् ।

‘भरतको गाउँसहित आसपासका सबै क्षेत्रमा प्रहरीले निगरानी बढाएको छ,’ नेपाल समयसँग कुरा गर्दै एसपी कार्कीले भने, ‘नेपाल मात्रै नभएर भारतीय प्रहरीकोसमेत निरन्तर सम्पर्कमा छौँ । तर, परिणाम हात लाग्न सकेको छैन् ।’

चोरी चकारी गर्ने पृष्ठभूमि रहेका भरत लागु औषध दुव्र्यसनीसमेत रहेको बताउँदै एसपी कार्कीले उनी छिट्टै प्रहरीको नियन्त्रणमा आउने विश्वास व्यक्त गरे । उनले भने, ‘प्रहरीले मात्र उसको खोजी गरेको छैन् । त्यहाँका स्थानीयहरुले पनि भरतको खोजी गरिरहेको छ । तर, सफलता अझै पाउन सकिएको छैन् ।’ 

एक ठाउँमा स्थिर भएर बस्ने भरतको बानी नरहेको कारण पनि पक्राउगर्न नसकिएको उनले बताए । ८ महिने बालिका सोनालिकाको अपहरणपछि हत्या गर्ने भरतनै रहेको र ढिलोचाँडो प्रहरीको नियन्त्रणमा आउने एसपी कार्की बताउँछन् ।

अपराधीको पहिचान भइसक्दा पनि पक्राउ नपर्नु दुखद रहेको सोनालिकाका बाबु सन्तोष बताउँछन् । सोनालिका फर्केर नआएपनि अपराधीलाई छोडे अरु छोरीहरु पनि असुरक्षित हुने भन्दै सन्तोषले दोषीलाई कडा कारबाही गर्न माग गरे ।

को हुन भरत ?

८ महिने बालिका सोनालिकाको अपहरणपछि हत्या गर्ने भरत वैदेशिक रोजगारका लागि खाडी मुलुक पुगेका थिए । तर, ५÷६ महिनामा त्यहाँबाट फर्किएका उनी चोरीसम्बन्धी घटनामा जेल परेको एसपी कार्कीले बताए । 

भरत लागुऔषध दुव्र्यसनी समेत हुन् । तीन दिन अगाडी उनी भिठ्ठामोडबाट लागुऔषध ट्याबलेट खरिद गरेको खुलेको छ । भरतको घरपरिवारमासमेत राम्रो सम्बन्ध नरहेको र घरबाट निकालिएको कार्कीले बताए । पटक पटक चोरीका घटनागर्न थालेपछि पछिल्लो पटक उनी गाउँबाटै निकालिएको प्रहरीको अनुसन्धानले देखाएको छ । 

आफ्नो मोबाइल नबोकेर चोरीको मोबाइल प्रयोग गर्ने उसको बानी रहेको एसपी कार्कीले बताए ।