यात्रु रित्तो हात फर्किए : किन खोलिएन अग्रिम टिकट बुकिङ ? 

काठमाडौ- पूर्व घोषणाबमोजिम शुक्रबारबाट अग्रिम टिकट बुकिङ नखुल्दा सर्वसाधरण मर्कामा परेका छन् । दशैँमा घर जानका लागि बिहानै टिकट लिन बसपार्क पुगेका सर्वसाधरणहरु रित्तो हात फर्किनु परेपछि निराश भएका हुन् । 

टिकट कहिले खुल्ने वा नखुल्ने भन्ने विषयमा अन्योल देखिएपछि सर्वसाधरणमा दशैँमा घर जान नपाइने होकी भन्ने त्रास देखिन थालेको छ । दशैँको मुखमा आएर यातायात ब्यबसायीले विभिन्न माग राख्दै अग्रिम टिकट बुकिङ नखोले पछि  सर्वसाधरणहरु अन्योलमा परेका छन् । 

यसअघि सरकार र यातायात व्यवसायीबीच असोज ५ गतेदेखि अग्रिम टिकट बुकिङ खुलाउने सहमति भएको थियो । यातायात व्यवस्था विभाग र यातायात व्यवसायीले लामो दूरीका सवारी साधनको आजदेखि टिकट बुकिङ खुला गर्ने भनेका कारण अग्रिम टिकट बुकिङका लागि यात्रुहरु नयाँ बसपार्क पुगेका थिए।

किन खोलिएन अग्रिम टिकट बुकिङ ?

पूर्वसहमति विपरित सरकारले पेट्रोलियम पदार्थको मूल्यवृद्धि गरेको भन्दै यातायात व्यवसायीले अग्रिम टिकट बुकिङ खुला नगर्ने निर्णय गरेका हुन् । सरकारले सहमती गरेपछि आफैले सहमति लत्याउदै व्यवसायीलाई पेल्ने काम गरेको भन्दै उनीहरुले पूर्वनिर्धारित मितिमा टिकट खुल्ला नगरेका हुन् । 

तर, सरकारले भने स्वचालित मूल्य प्रणालीअन्तर्गत इन्धनको मूल्य बढेको बताउँदै आएको छ । दशैँको मुखमा यातयात व्यवसायीले सरकारलाई ब्ल्याकमेलिङ गर्न खोजेको यातायात व्यवस्था विभागको ठहर छ । 

बाहिर भन्नलाई इन्धनको मूल्य बढेको भनेर विरोध गरिए पनि भित्रि कारण भने आफूहरुको बन्द भएको बैंक खाता खुल्नु पर्ने उनीहरुको माग छ । यातायात व्यवसायी राष्ट्रिय महासंघका बरिष्ठ उपाध्यक्ष विजय स्वारले नेपाल समयसंग कुरा गर्दै सरकारले सहज वातावरण नबनाएसम्म अग्रिम टिकट खोल्न नसकिने बताए ।

'दशैँका बेला टिकट काट्दा उठ्ने लाखौ रुपैयाँ कहाँ लगेर राख्ने ? खाता रोक्का भएपछि चाडबाडका बेला कर्मचारीलाई कसरी तलव भत्ता खुवाउने ? त्यसैले सरकारले रोक्का गरिएको बैंक खाता तत्काल खोल्नु पर्छ ।' उनले भने । 

सरकार भने समितिको नाममा जनताबाट असुलेको रकम निकाल्न मिल्ने गरि तत्काल बैंक खाता नखोल्ने मूडमा छ । यातायात व्यबस्थामन्त्री रघूवीर महासेठ समितिहरु प्रालिमा नगएसम्म बैंक खाता नखोल्ने पक्षमा कडा रुपमा उभिएका छन् । दुई पक्षको लडाइँको चेपुवामा सर्वधारण परेका छन् ।