जनकपुरधाम-मुलुकी संहिताको विरोधमा चालकहरुले गाडी ठप्प पारेपछि जनकपुरसहित यस क्षेत्रको जनजीवन कष्टकर बन्दै गएको छ । चालकहरुका हडतालका कारण नीजि, सार्वजनिक तथा भाडाका गाडीहरुसमेत गुड्न नसक्दा इन्धनको अभाव सृजना भएको छ ।
ट्यांकर चालकहरुले गाडी चलाउन बन्द गरेपछि यस क्षेत्रमा इन्धनको अभाव हुन थालेको हो । मुलुकी संहितामा उल्लेख गरिएका केहि बुँदाप्रति असहमति जनाउँदै मुलुकभरका गाडी चालकहरुले २ असोजदेखि हडतालमा उत्रिएका हुन् ।
तत्काल यो समस्या समाधान नगरिए एक दुईदिनपछि पेट्रोल,डिजेलको अभाव निश्चित रहेको धनुषाको क्षिरेश्वर नगरपालिका महेन्द्रनगरस्थित आयल निगमका डिपो प्रमुख उपेन्द्र सुवेदीले बताए ।
सुवेदीले चालकहरु हडतालमा उत्रेपछि २ असोजदेखि इन्धन ढुवानी हुन नसकेकोले अभावको व्यापक संभावना रहेको बताए । उनले भने,‘महेन्द्रनगर डिपोमा भण्डारण गर्ने व्यवस्था छैन् । इन्धन बोकेर भारतबाट आएको गाडीमै इन्धन रहिरहन्छ । तर, गाडी गुड्न सकेको छैन् । ’
डिजेलको १५/२० गाडी स्टक रहेपनि पेट्रोलको एउटापनि गाडी नरहेको उनले जानकारी दिए । डिजेलको तुलनामा पेट्रोल धेरै खपत हुने गरेकोले तत्काल समस्या समाधान नगरिए अभाव सृजना हुने निश्चित रहेको सुवेदीको भनाइ छ ।
२ असोज भन्दाअघि भारतबाट ढुवानी गरिएको इन्धले अहिले जेनतेन काम चलिरहको सुवेदी बताउँछन् । सुवेदीका अनुसार डिपोमा पेट्रोलको भण्डारण सकिसकेको छ ।
इन्धन ढुवानीमा सहयोग नगर्ने ढुवानी व्यवसायीको अनुमति खारिज गर्नेगरी कारवाही गर्न केन्द्रले आफूहरुलाई निर्देशन दिएपनि चालकहरुले हडताल गरेपछि समस्या उत्पन्न भएको उनको भनाइ थियो ।
चालकहरुले सार्वजनिक सवारी साधन बन्द गरेपछि गन्तव्यतर्फ पुग्न प्रयोग भइहरेको मोटरसाइकलसमेत पेट्रोलको अभावमा चलाउन समस्या आउन सक्ने अनुमान गरिएको छ । जनकपुर क्षेत्रमा दैनिक ३/४ टयांकर पेट्रोल र ५/७ टयांकर डिजेल खपत हुने गरेको महेन्द्रनगर डिपोले जनाएको छ । महेन्द्रनगर डिपोमा भारतको बरौनीबाट भिठ्ठामोड नाकाहुँदै इन्धन भित्रिने गरेको छ । बरौनीबाट ६०/६५ वटा टयांकर इन्धन बोकेर आउने गरेको छ ।
त्यसैगरी १ असोज पछि जनकपुर क्षेत्रमा खाना पकाउने ग्यास पनि ढुवानी हुन सकेको छैन् । खाना पकाउने ग्यासको पछिल्ला भण्डारण पनि लगभग सकिने अवस्थामा पुगेको ग्यास व्यवसायी संघका पूर्व अध्यक्ष मनोज चौधरीले जानकारी दिए । जनकपुरमा मासिक ३० देखि ३५ हजार सिलिण्डर खपत हुने गरेको उनले बताए ।
यता सार्वजनिक यातायातको सवारी साधन नचलेपछि यात्रुहरुलाई सास्ती भएको छ । पछिल्लो तीन दिनदेखि सवारी साधन चल्न नसकेपछि गन्तव्यतर्फ पुग्न यात्रुहरुलाई समस्या भएको हो । चालकहरु हडतालमा उत्रिएपछि बस, ट्रक, ट्रयाक्टर, भाडाका जीपलगायतका साधनहरु चल्न छोडेपछि सडकमा सवारी साधनको संख्या पातलिएको छ ।
चालकहरुले मुलुकी संहिता ऐनको परिच्छेद ५ र १० प्रति आपत्ति जनाउँदै हडतालमा उत्रिएका हुन् । संहिताको परिच्छेद ५ मा परिचालक अनुमतिपत्र सम्बन्धी व्यवस्था गरिएको छ ।
यसैगरी परिच्छेद १० मा सजाय सम्बन्धी व्यवस्था छ । गाडीको ठक्करबाट कुनै मानिसको ज्यान गएमा वा गाडी दुर्घटनामा यात्रुको मृत्यु भएको खण्डमा चालकलाई जन्म कैद वा पाँच देखि १२ वर्षसम्म कैद सजाय हुने उल्लेख छ । सोहि परिच्छेदको दफा १६२ मा गाडीमा रहेका यात्रु वा गाडीको ठक्करबाट बाहिरी मान्छे घाइते भइ अङ्गभङ्ग भएमा तीनदेखि १० वर्षसम्म कैद सजायको व्यवस्था छ ।
प्रकाशित: Dec 31, 2017| 18:23 आइतबार, पुस १६, २०७४