जनकपुरधाम- चालकहरुको हडतालका कारण जनकपुरसहित यस क्षेत्रको जनजीवन प्रभावित भएको छ। १ भदौदेखि लागू भएको मुलुकी संहिताको विरोध गर्दै चालकहरु आन्दोलनमा उत्रिएका हुन्।
चालकहरु नै आन्दोलनमा उत्रिएपछि जनकपुरबाट चल्ने लामो तथा छोटो दुरीका सार्वजनिक यातायातका साधन चल्न सकेको छैन्। सार्वजनिक यातायातको साधन सञ्चालनमा हुन नसकेपछि यात्रुहरु अलपत्र परेका हुन्।
सार्वजनिक यातायातका साधनका साथै नीजि यातायातको सवारी साधन पनि चालकहरुले गुडाएका छैनन्। चालकहरुको हड्तालका कारण जीप, कार, ट्रक, ट्रयाक्टरलगायतका साधन चल्न सकेका छैनन्। एम्बुलेन्स सञ्चालनमा रहेपनि एम्बुलेन्स चालकलाई पनि काम बन्द गर्न दबाब आइरहेको जनाइएको छ।
चालकहरुले मुलुकी संहिता ऐनको परिच्छेद ५ र १० प्रति आपत्ति जनाउँदै हडतालमा उत्रिएका हुन्। संहिताको परिच्छेद ५ मा परिचालक अनुमतिपत्र सम्बन्धी व्यवस्था गरिएको छ।
यसैगरी परिच्छेद १० मा सजाय सम्बन्धी व्यवस्था छ। गाडीको ठक्करबाट कुनै मानिसको ज्यान गएमा या गाडी दुर्घटनामा यात्रुको मृत्यु भएको खण्डमा चालकलाई जन्मकैद वा पाँच देखि १२ वर्षसम्म कैद सजाय हुने उल्लेख छ। सोही परिच्छेदको दफा १६२ मा गाडीमा रहेका यात्रु वा गाडीको ठक्करबाट बाहिरी मान्छे घाइते भइ अङ्गभङ्ग भएमा तीनदेखि १० वर्षसम्म कैद सजायको व्यवस्था छ।
सरकारले ल्याएको नयाँ कानुनमा चारैतर्फबाट चालक नै दोषी ठहरिने अवस्था देखिएको भन्दै संशोधनको माग गर्दै चालकहरु अनिश्चितकालीन हडतालमा उत्रिएको जनकपुर अञ्चल बस व्यवसायी संघका अध्यक्ष मनोज चौधरीले जनाए।
प्रकाशित: Dec 31, 2017| 18:23 आइतबार, पुस १६, २०७४