सोसीडाडको घरेलु मैदानमा बार्साको संघर्ष पुर्ण जित

बार्सा (एजेन्सी)-साविकको विजेता बार्सिलोनाले ला लिगामा रियल सोसीडाडलाई २-१ ले पराजित गरेको छ । यस नतिजासँगै ला लिगामा बार्सा शतप्रतिशत नतिजा कायम राख्न सफल भएको छ ।

खेलको १२ औं मिनेटमा बार्सिलोनाका डिफेन्सले फ्रिकिक क्लिअर गर्न नसक्दा अरिट्ज एलुस्टोन्डोले घरेलु टोलीलाई अग्रता दिलाएका थिए । बार्साका लागि ६३ औं मिनेटमा लुइस सुआरेज तथा त्यसको केहि मिनेटमै ओस्मान डेम्बेलेले गोल गर्दै २-१ को अग्रता दिलाए । 

बार्सिलोनाका गोलरक्षक मार्क आन्देर टेर स्टेगनले सोसोडाडले बराबरी गर्ने तीन अवसरको उत्कृष्ट बचाउ गर्दै खेलमा अग्रता कायम राखे । खेलको अन्तिम समयमा पनि जुआन्मीले हेडरमा गोल गर्न नसक्दा सोसीडाडले अंक जोड्न सकेन ।

पहिलो हाफमा खराब प्रदर्शन गरेको बार्सिलोनाले विपक्षी गोलरक्षकको गल्तिको फाइदा पनि उठाउन सकेको थिएन ।