भिरबाट लडेर घाइते भएका रनवीरको हेलिकोप्टरबाट उद्धार

धनगढी- भिरबाट लडेर गम्भीर घाइते बाजुराको हिमाली गाउँपालिका-४ का ३३ बर्षीय रनवीर भण्डारीको उपचारका लागि हेलिकोप्टर प्रयोग गरिएको छ।
 
शुक्रबार बिहान घर नजिकैको भिरबाट लडेर घाइते भएका भण्डारीको नजिक स्वास्थ संस्था नभएर उपचारमा समस्या भएपछि प्रदेश ७ को सामाजिक विकास मन्त्रालयको पहलमा हेलिकप्टरबाट सुर्खेत लगिएको हो। 

सामाजिक विकास मन्त्रालयले दिएको जानकारी अनुसार यातायातकोसमेत सुविधा नभएको दुर्गम क्षेत्रमा उपचारको अभावमा ज्यान नै जान सक्ने भएपछि रुगिनको बोर्ताबाट सुर्खेतसम्म हेलिकोप्टरमा लगिएको र त्यहाँबाट थप उपचारको लागि कोहलपुर पुर्‍याईएको छ। 

हेलिकोप्टरको खर्च सामाजिक विकास मन्त्रालयले व्यहोर्ने छ। प्रदेश ७ का सामाजिक विकास मन्त्री दीर्घ सोराडी, आन्तरिक मामिला तथा कानुन मन्त्री प्रकाश बहादुर शाह र प्रदेश सभा सदस्य बलदेव रेग्मीको पहलमा उक्त कार्य भएको मन्त्रालयले जानकारी दिएको छ। 

सामाजिक विकास मन्त्रालयले यसअघि पनि बझाङको एक सुत्केरी महिलालाई स्थानीयस्तरमा उपचार असम्भव भएपछि हेलिकोप्टरबाट कोहलपुर लगेको थियो।