सीके राउत खोज्दै प्रहरी

जनकपुरधाम- ३ असोज  अर्थात नेपालको संविधान २०७२ जारी भएको दिन । ३ असोजलाई नेपाल सरकारले संविधान दिवसको रुपमा मनाउँदै आइरहेको छ । तर, स्वतन्त्र मधेश गठबन्धनका अध्यक्ष सीके राउत ३ असोजलाई कालो दिवस मनाउने तयारी गरेका छन् ।

तराई मधेशमा विखण्डनका नारा लगाउँदै आइरहेका राउतले संविधान जारी भएको दिन ३ असोजमा जनकपुरमा आमसभा गर्ने तयारी गरेका छन् । राउत समर्थकहरुले सामाजिक सञ्जालमार्फत ३ गते जनकपुरमा हुने आमसभामा सहभागी हुन सर्वसाधारणलाई अपिल गरेका छन् । 

स्वतन्त्र मधेश गठबन्धनका एक कार्यकताले संविधानविरुद्ध आफूहरुले ३ असोजमा जनकपुरमा विरोध कार्यक्रम गर्न गइहरेको बताए । गठबन्धनका कार्यकर्ता एसएन मण्डलले आमसभामा अध्यक्ष राउतपनि सहभागी हुने दाबी गरे ।

नेपाल समयसँग कुरा गर्दै मण्डलले आमसभास्थल तय नभएपनि जनकपुरको रामानन्द चोकमा कार्यक्रम हुन सक्ने बताए । राउत त प्रहरीको खोजी सूचीमा रहेको प्रश्नमा मण्डलले भने,‘हामी आमसभा गर्छौं र राउतजी पनि सहभागी हुनुहुन्छ ।’

यसअघि खुल्ला सभागर्न प्रशासनले अवरोध गर्दै आइरहेको जिज्ञासामा मण्डलले प्रशासनले गर्ने गरेको अवरोधको आफूहरुलाई मतलब नरहेको जिकीर गरे । गठबन्धनका संयोजक राउत अहिले कताछन् भन्ने प्रश्नमा मण्डलले बोल्न चाहेनन् ।

राउतको कार्यक्रमका विषयमा आफूहरुले सञ्चार माध्यमबाट जानकारी पाएको धनुषाका प्रमुख जिल्ला अधिकारी प्रेम लामिछानेले बताए । ३ असोजमा हुने राउतको कार्यक्रमबारे विभिन्न सञ्चार माध्यममा आइरहेको सूचनाहरुलाई आफूहरु विश्लेषण गर्ने क्रममा रहेको उनले बताए । संविधानको अधिनमा रहेर गरिने कुनैपनि कार्यक्रममा अवरोध गर्ने आफूहरुको सोच नरहेको प्रमुख जिल्ला अधिकारी लामिछानेले बताए । यद्यपी सरकारको निर्देशन कुरेर बसी रहेको उनको भनाइ छ ।

जिल्ला प्रहरी कार्यालय धनुषाका प्रवक्ता डीएसपी दीपेन्द्रबहादुर शाहीले राउतलाई गिरफ्तार गर्न हालसम्म आफूहरुलाई कुनै निर्देशन नआएको दाबी गरे । ३ असोजमा उनले गर्न लागेको कार्यक्रमबारे समेत आफूहरुले आधिकारिक रुपमा कुनै जानकारी नपाएको उनको भनाइ छ ।

यसअघि जनकपुरधाम उपमहानगरपालिका–४ स्थित माछा बजार नजिक भाडाको घरमा बस्दै आएका स्वतन्त्र मधेश गठबन्धनका अध्यक्ष डा.राउतले अहिले आफ्नै घर बनाएका छन् । राउत अहिले जनकपुर–८ मा आफ्नो नीजि घरमा बस्दै आएका छन् । प्रहरीको निरन्तर खोजीमा रहेका राउतले आफ्नो घरमा सीसी टीभी क्यामरा जडान गरेका छन् । सुरक्षाको दृष्टिकोणले उनी आफ्नो घरमा सीसी टीभी क्यामरा जडान गरेको उनका कार्यकर्ताहरु बताउँछन् ।

यता नेपाल प्रहरीले भने राउतलाई खोज्ने अभियान तीव्र बनाएको बताइएको छ । प्रहरीका अनुसार राउत पछिल्लो समय अर्धभूमिगत अवस्थामा छन् । प्रहरीका एक उच्च अधिकारीका अनुसार गोप्य रुपमा राउतको गतिविधि राज्यको कानुनलाई चुनौती दिने खालका रहेकोले निगरानी बढाइएको हो । राउतलाई पटक–पटक समातेर राज्यविप्लवको मुद्दा चाइएपनि उनी अदालतको आदेशअनुसार रिहा हुँदै आएका छन् ।