आजका अखबार : गोपनीयता विधेयकमा पर्नैपर्ने संसोधन परेन 

काठमाडौं- राजधानीबाट प्रकाशित  राष्ट्रिय दैनिक अखबारहरुले बिविध विषयका खबरलाई पहिलो प्राथमिकतामा पारेका छन् । 

कसैले गोपनीयता विधेयकका ९० विषयमा संसोधनको प्रस्ताव परेको विषयलाई मुख्य समाचार बनाएका छन् भने कसैले त्रिविका प्राध्यापकबाटै प्रश्नपत्र आउट गरिएको विषयलाई प्राथमिकतामा पारेका छन् । 

आजको कान्तिपुर र नागरिक दैनिकले गोपनियता विधेयकमा रहेका प्रावधान र संसोधनका लागि परेको प्रस्तावको विषयलाई मुख्य समाचार बनाएका छन् । कान्तिपुरमा प्रकाशित समाचारअनुसार सार्वजनिक पद धारण गरेका व्यक्तिकै धेरै विषय गोप्य राख्ने गरी ल्याइएको वैयक्तिक गोपनीयताको विधेयकमाथि दर्जनौं सांसदले संशोधन प्रस्ताव राखेका छन् ।

उनीहरू सार्वजनिक पदधारीको सम्पत्ति, शैक्षिक योग्यता प्रमाणपत्रलगायत विवरण सार्वजनिक गर्न रोक लगाउन नहुने पक्षमा छन् । ३१ जना सांसदले एकल तथा सामूहिक गरी प्रस्तावित विधेयकको ९० वटा विषयमा संशोधन हालेका हुन् । सत्तारूढ दलकै सांसद गोपनीयताको हकका नाममा सार्वजनिक पदधारीलाई दिन खोजिएको उन्मुक्तिको विरोधमा देखिएका छन् ।

यता नागरिक दैनिकले भने गोपनियता विधेयकमाथि विभिन्न बुँदाहरु संसोधनको माग गरिए वैयक्तिक सूचना संकलनमा लगाइएको अंकुश हटाउन भने कसैले पनि माग नगरेको खबर लेखेको छ । उसले वैयक्तिक सूचना संकलनका लागि लगाईको सात सर्तमा संसोधन नगरेको भन्दै यसमा सांसदहरुको पनि समर्थन देखिएको उल्लेख गरेको छ । प्रेसलाई केन्द्रमा राखेर विधेयकको दफा २३ को उपदफा ४ मा वैयक्तिक सुचना संकलनमा ७ वटा पूर्वसर्त राखिएको नागरिकले लेखेको छ । 

यस्तै नागरिक दैनिकले राष्ट्रपतिलाई दबाब दिए सात वर्ष कैद शीर्षकमा अर्को मुख्य खबर छापेको छ । मुलुकी अपराध संहितामाको राज्यविरुद्धको कसुरको दफा ५८ मा रहेको यो व्यबस्था प्रति आपत्ति जनाउदै कानुनविद्हरुले त्यसलाई खारेज गर्नुपर्ने माग गरेका छन् । नागरिकले ३३ किलो सुन तस्करी प्रकरणको प्रतिवेदन प्रधानमन्त्री कार्यालयमा थन्किएको विषयलाई पनि महत्वकासाथ प्रकाशित गरेको छ । 

यस्तै आजको नयाँ पत्रिकाले प्राध्यापकबाटै प्रश्नपत्र आउट शीर्षकमा मुख्य समाचार छापेको छ । त्रिविमा आइतबार र मंगलबार लगातार स्नातकोत्तर तहको प्रश्नपत्र आउट भएको थियो भने परिक्षा पनि स्थगित गरिएको समाचारमा जनाइएको छ ।

नयाँ पत्रिकाले केहि दिनदेखि लगातार त्रिविमा रहेको वेथितीहरु उठान गरिरहेको छ । यस्तै कर्मचारी बढुवा अब ९० प्रतिशत ज्येष्ठताका आधारमा र १० प्रतिशत क्षमताका आधारमा हुने विषयलाई पनि नयाँ पत्रिकाले महत्वका साथ छापेको छ । 

राष्ट्रसंघीय महासभामा प्रधानमन्त्री जाने शीर्षकमा एङ्कर न्युज छापेको आजको अन्नपूर्ण पोस्ट्ले मन्दिरको गेट बाहिर तीन घण्टा शीर्षकमा मुख्य समाचार छापेको छ । शिक्षा अभियन्ता उत्तम सञ्जेलको विवाहमा शुभकामना दिन गएका एक ७५ वर्षीय बेलायति नागरिक तीन घण्टा पशुपतिनाथ बाहिर कुरेर बसेको विषयलाई अन्नपूर्णले मुख्य समाचार बनाएको हो । 

आजको कारोबार दैनिकले भने नफामूलक उद्योग खोल्ने सेनाको प्रस्ताव रक्षा मन्त्रालयबाटै अस्विकृत भएको र यूएस बंगला दुर्घटनाको अध्ययन प्रतिवेदनले तनावमा रहेका क्यापटेनलाई मुख्य दोषी देखाएको विषयलाई प्रमुख समाचार बनाएको छ ।