काठमाडौं- बहुक्षेत्रीय प्राविधिक तथा अर्थिक समन्वयका लागि बंगालको खाडीको प्रयास (बिमस्टेक) मा नेपाल सन् २००४ मा पर्यवेक्षकबाट सदस्यको भूमिकामा गयो । त्यही समयमा हो, सदस्य मुलुकबीच खुला व्यापार क्षेत्र अर्थात् 'फ्री ट्रेड' को अवधारणा आएको पनि ।
सदस्य बनेयता नेपालले पहिलो पटक बिमस्टेक शिखर सम्मेलनको आतिथ्यता गर्यो । चर्चा शुरु भएको १४ वर्षमा पनि 'फ्री ट्रेड'को अवधारणा लागू हुन सकेको छैन । चौथो शिखर सम्मेलनमा त यो विषयले प्रवेश नै पाएन ।
अघिल्ला शिखर सम्मेलनमा यो विषय 'नेगोसिएसन'कै रूपमा थियो । चौथो शिखर सम्मेलनबाट पनि यसले 'नेगोसिएसन'को चरणबाट बाहिरिन पाएन । 'त्यसका लागि विभिन्न सन्धि, सम्झौता आवश्यक छन्,' परराष्ट्रमन्त्री प्रदीप ज्ञवाली भन्छन् ।
अर्थविज्ञहरूका अनुसार खुला व्यापारसम्बन्धी बिमस्टेक खाका सम्झौता एक दशकअघि नै तयार भए पनि हालसम्म हस्ताक्षर भने हुनसकेको छैन । खुला व्यापार क्षेत्रका लागि भन्सारलगायत अलग व्यवस्था गर्नुपर्छ, जसले भविष्यमा दूरगामी प्रभाव पार्न सक्ने उद्योग, वाणिज्य तथा आपूर्ति मन्त्रालयका सहसचिव तर्कराज भट्ट बताउँछन् ।
'यस सम्बन्धमा विभिन्न चरणमा छलफल भएको छ तर अहिलेसम्म मूर्त रूप पाउन सकेको छैन,' उनी भन्छन् ।
विकासशील देशहरूले अल्पविकसित तथा विकासोन्मुख मुलुकहरूलाई आवश्यक 'प्रोटेक्सन'को व्यवस्था गरी खुला व्यापार क्षेत्र स्थापना गर्नुपर्ने राष्ट्रिय योजना आयोगका पूर्वसदस्य डा. गोविन्द नेपाल बताउँछन् । भन्छन्, 'त्यस्तो संरक्षण करिब सात वर्ष दिइनुपर्छ, जसले नेपालजस्तो अल्पविकसित देशको व्यापार घाटा न्यूनीकरण गर्न सहयोग गर्छ ।'
'दुई पक्षीय उच्च अधिकारीहरूको नेगोसिएसन बैठक बस्नुपथ्र्यो तर विभिन्न कारणले हुन सकेन । जुलाईमा बस्ने भन्यौं, बस्न सकिएन र अगस्टमा सारियो । त्यसबेला पनि हुन सकेन ।'
नेपालले औद्योगिक वस्तुको यान्त्रीकरण तथा उत्पादनलाई व्यावसायीकरण गर्न झण्डै सात वर्ष लाग्ने डा. नेपालको भनाइ छ । अन्य देशहरूसँग प्रतिस्पर्धी बन्न त्यति अवधि लाग्ने भएकाले अतिरिक्त सुविधासहित खुला व्यापार स्थापनाको बिमस्टेक सम्झौता गर्नुपर्र्ने उनको बुझाइ छ ।
भारत, थाइल्यान्डलगायत सदस्य मुलुकले खुुला व्यापारको मुद्दा उठाउँदै आएका छन् । खुला व्यापार क्षेत्र स्थापनाले निर्यात÷आयात गरिने वस्तुहरूको अवरोध हट्नेछ । अवरोध हटाइँदै गर्दा भारत, थाइल्यान्डलगायतले अन्य अल्पविकसित देशहरूलाई भने अतिरिक्त व्यवस्था गरी तंग्रिन मौका दिनुपर्ने अर्थविज्ञहरूको भनाइ छ ।
नेपालले बिमस्टेकको सदस्यता लिँदा परराष्ट्रमन्त्री थिए, भेषबहादुर थापा । त्यतिबेलाको शिखर सम्मेलनले खुला व्यापारको नेगोसिएसनका लागि बाटो खोलेको उनी बताउँछन् । 'बिमस्टेक शिखर सम्मेलनको १८ बुँदे काठमाडौं घोषणापत्रमै टेकेर नेगोसिएसन हुने हो,' उनी भन्छन्, 'खुला व्यापार फ्रेमवर्कका लागि विस्तारै नेगोसिएसन गर्दै अघि बढ्ने हो ।'
हरेक देशको आ-आफ्नै भन्सारसम्बन्धी व्यवस्था हुन्छ । कुन देशसँग कुन उत्पादनमा कति भन्सार महशुल लगाउने भन्ने निर्णय हतारमा गर्न नसकिने उनको भनाइ छ । 'यसले दीर्घकालीन प्रभाव पार्छ,' उनी भन्छन्, 'त्यसैले पनि टुंगोमा पुर्याउन गाह्रो भएको हो । शुरुवाती हुनु भनेको सकारात्मक हो ।'
खुला व्यापारका विषयमा छलफल गर्न बैठक नै बसेन
बिमस्टेकको शिखर सम्मेलनका क्रममा खुला व्यापारको चर्चा चले पनि वास्तविकता त्यसभन्दा फरक छ ।
बिमस्टेकको शिखर सम्मेलनका लागि भनेर खुला व्यापार नेगोसिएसनका बैठक हुन नसकेको उद्योग, वाणिज्य तथा आपूर्ति मन्त्रालयको भनाइ छ । पछिल्लो समय खुला व्यापारसम्बन्धी नेगोसिएसनका लागि बिमस्टेकका सात देशका उच्च अधिकारीहरूसँग बैठक नभएको मन्त्रालयका सहसचिव रविशंकर सैंजु बताउँछन् ।
'दुई पक्षीय उच्च अधिकारीहरूको नेगोसिएसन बैठक बस्नुपथ्र्यो तर विभिन्न कारणले हुन सकेन,' उनी भन्छन्, 'जुलाईमा बस्ने भन्यौं, बस्न सकिएन र अगस्टमा सारियो । त्यसबेला पनि हुन सकेन ।'
यातायात गुरुयोजनादेखि गरिबी निवारणसम्मका प्रतिबद्धता
बिहीबार र शुक्रबारको बिमस्टेक शिखर सम्मेलनले यस क्षेत्रको यातायातदेखि सन् २०३० सम्ममा गरिबी निवारण गर्ने प्रतिबद्धता जनाएको छ ।
बिमस्टकको काठमाडौं घोषणापत्रमा क्षेत्रीय सञ्जाल 'कनेक्टीभिटी' विस्तार, पूर्वाधार विकास, गरिबी निवारण, आतंकवाद नियन्त्रणलगायत विषय समेटिएका छन् । सडक, रेल, जलमार्ग र समुद्री मार्ग समेट्ने गरी विभिन्न प्रणाली भएको यातायात सञ्जाल विस्तार गर्ने, सहज, सुलभ र उच्च क्षमताको इन्टरनेट सञ्जाल विकास गर्ने, बिमस्टेक सचिवालय तथा विभिन्न सहकार्यलाई अझ चुस्त बनाउँदै स्थायी संयन्त्र निर्माण गर्ने घोषणा पत्रमा उल्लेख छ ।
यस्तै, श्रीलंकामा हुने पाँचौं शिखर सम्मेलनमा बिमस्टेकको बडापत्र तयार गर्ने, विभिन्न सदस्य मुलुकहरूले आ-आफ्नो क्षमताअनुसार रकम जम्मा गरी बिमस्टेक विकास कोष अघि बढाउने, आतंकवादी गतिविधिमा हुने लगानी रोक्दै आतंकवाद नियन्त्रणमा सहकार्य गर्नेलगायत मुद्दा घोषणा पत्रमा समेटिएको छ ।
प्रकाशित: Dec 31, 2017| 18:23 आइतबार, पुस १६, २०७४