आजका अखबार :  बिमस्टेकमा कस्ता एजेन्डाले पाए प्राथमिकता ?

काठमाडौं- राजधानीबाट प्रकाशित शुक्रबारका राष्ट्रिय दैनिक अखबारहरुले बिहीबारबाट सुरु भएको बिमस्टेक शिखर सम्मेलनको विषयलाई मुख्य प्राथमिकतामा पारेका छन् । 

कनेक्टिभिटी, ब्यापार र उर्जाका विषयमा विशेष केन्द्रित भएको बिमस्टेक शिखर सम्मेलनमा बुद्ध सर्किटका विषयमा पनि छलफल भएको छ । सम्मेलनमा सातै सदस्य राष्ट्र तथा सरकार प्रमुखले सम्बोधन गरेका थिए ।

सम्बोधनका क्रममा नेपालका प्रधानमन्त्री केपीशर्मा ओलीले बिमस्टेक सार्कको विकल्प बन्न नसक्ने धारणा राखेका थिए भने भारतीय प्रधानमन्त्री नरेन्द्र मोदीले आधा दर्जन प्रस्ताव गरेका थिए । उनले बिमस्टेक महिला सांसदको विशेष फोरम बनाउन, पर्यटन, संस्कृति तथा कला र सामुद्रिक कानुन, सेन्टर फर बे अफ बंगाल स्थापना गर्नलगायतका प्रस्ताव गरेका थिए । 

यसै विषयलाई मुख्य समाचार बनाउदै आजको कान्तिपुर दैनिकले 'बिमस्टेकको मुख्य जोड कनेक्टिभिटी र बुद्ध सर्किट' शीर्षकमा खबर छापेको छ । अन्नपूर्ण पोस्ट्ले भने 'बिमस्टेक शिखर सम्मेलन सुरुः समृद्धिका लागि अर्थपूर्ण सहकार्य' शीर्षकमा खबर लेखेको छ ।

नागरिक दैनिकले प्रधानमन्त्री ओलीले बिमस्टेक सार्कको विकल्प बन्न सक्दैन भनि दिएको अभिब्यक्तिलाई मुख्य समाचार बनाएको छ । नयाँ पत्रिकाले 'लगानीमा सार्क अघि, व्यापारमा बिमस्टेक' शीर्षकमा खबर छापेको छ । कारोबार दैनिकले 'बिमस्टेकमा 'ब्लु' इकोनोमीको एजेन्डा' शीर्षकमा मुख्य समाचार प्रकाशित गरेको छ । 

बिमस्टेक बाहेका आजको कान्तिपुरले भारतसंग छुट्टै सम्झौता हुने खबर लेखेको छ । रक्सौल–काठमाडौं विद्युतीय रेलमार्गको इन्जिनियरिङ अध्ययन सम्झौता हुने भएको हो । नागरिक दैनिकले भने सत्यनिरुपण र वेपत्ता छानविन आयोगका पदाधिकारी र कानुनमन्त्री आरोपप्रत्यारोपमा उत्रिएको खबर छापेको छ । 

कात्तिकबाट कर्मचारी समायोजनको तयारी भएको विषयलाई एङ्कर न्यूज बनाएकोे आजको नयाँ पत्रिकाले गरिबी निवारण कोषको ३१ अर्बको अभिलेख नष्ट भएको खुलासा गरेको छ । कोषले २०६० सालदेखि सञ्चालन गर्दै आएको कार्यक्रमको डाटा भएको सफ्टवेयरमा क्षति भएको समाचारमा जनाइएको छ ।