काठमाडौं- प्रतिबन्धित लागुऔषध ब्राउन सुगर तस्करी गरेको आरोपमा प्रहरीले झापाबाट दुई महिला पक्राउ गरेको छ। पक्राउ पर्नेमा झापा जिल्ला दमक नगरपालिका-१ की ३४ वर्षीया मञ्जु धिमाल र सोही स्थानकी २५ वर्षीया विमला धिमाल छन्।
झापा गौरीगञ्ज गाउँपालिका-४ कदमगाछीस्थित सीमा प्रहरी चौकी खजुरगाछी र सशस्त्र प्रहरी बलको संयुक्त प्रहरी टोलीले जाँच गर्ने क्रममा मञ्जुले गुप्तांगमा ब्राउन सुगर लुकाएको पाइएको थियो। विमलाको पनि संवेदनशील अंगमा ब्राउन सुगर भेटिएको थियो।
उनीहरू दुवैका साथबाट प्रहरीले ४४.३ ग्राम ब्राउनसुगर फेला पारेको छ। दुवैलाई अनुसन्धानको लागि इलाका प्रहरी कार्यालय गौरीगञ्जमा राखी अनुसन्धान गरिएको र आइतबार झापा जिल्ला अदालतबाट म्याद थप अनुमति लिई अनुसन्धान गरिने झापा प्रहरी प्रवक्ता प्रहरी नायब उपरीक्षक राकेश थापाले जानकारी दिए।