सुर्खेत- फेसबुकबाट साथीलाई अश्लील तस्बिर पठाउने एक व्यक्ति प्रहरीको फन्दामा परेका छन्। जिल्ला प्रहरीका अनुसार लेकबेंसी नगरपालिका-७ कल्याणका टीकाराम खड्का पक्राउ परेका हुन्।
फेसबुक आर्इडीबाट एक महिलालाई अश्लील फोटो पोस्ट गरी कसुर गरेको जाहेरी दरखास्त परेकाले पक्राउ गरिएको डीएसपी श्यामसिंह चौधरीले जानकारी दिए। उनका अनुसार खड्कालार्इ अावश्यक कारवाहीका लागि महानगरीय प्रहरी परिसर, काठमाडौं पठाइएको छ।
मुलुकी अपराध संहिता ऐन २०७४ अनुसार विद्युतीय माध्यमबाट अश्लील तस्बिर वा चित्र देखाएमा यौन दुर्व्यवहार मानिन्छ। त्यस्तो अभियोगमा तीन वर्षसम्म कैद र ३० हजार रुपैयाँसम्म जरिवाना हुने प्रावधान छ।
१ भदोदेखि लागू भएको मुलुकी अपराध संहिताअनुसार सामाजिक सञ्चालमा अश्लील तस्बिर पठाएर प्रहरीको फन्दामा परेको यो सुर्खेतको पहिलो घटना हो।
प्रकाशित: Dec 31, 2017| 18:23 आइतबार, पुस १६, २०७४