काठमाडौं- पुरुष थ्री बाइ थ्री बास्केटबलको समूह चरणको खेलमा नेपाल चौथो भएको छ । ६ राष्ट्र सहभागी समूह ‘सी’ को खेलमा शुक्रबार नेपालले १ मा वाक ओभर, १ मा जित र १ मा हारको सामना गर्दै समूह चरणमा नेपाल चौथो भएको हो । नेपालले माल्दिभ्सबाट वाक ओभर पाएको थियो भने जोर्डनलाई २१-१० ले पराजित गर्यो ।
नेपालको जितमा आशिष बस्नेतले सर्वाधिक १३ अंकको योगदान गरे । सिरिया विरुद्ध नेपाल २१-१९ ले पछि पर्यो । सिरिया विरुद्ध पनि आशिषले नै नेपालका लागि सर्वाधिक ९ अंक जोडेका थिए । त्यसअघि नेपाल कतार र जापानसंग पराजित भएको थियो । थ्री बाइ थ्रीअन्तर्गत महिलामा नेपालले शनिबार जापान र मंगोलिया विरुद्ध खेल्नेछ ।
पौडी : बनेन राष्ट्रिय कीर्तिमान
पौडीमा नेपाली खेलाडीले कुनै पनि स्पर्धामा राष्ट्रिय कीर्तिमान बनाउन सकेनन् । नेपालका सहभागी ४ खेलाडीले कुनै पनि स्पर्धामा राष्ट्रिय र्कीतिमान बनाउन नसकका हुन् । चारवटै खेलाडीको चुनौती एसियाडमा हिट चरणबाटै समाप्त भइसकेको छ । शुक्रबार ३ खेलाडीले प्रतिस्पर्धा गरेका थिए । गौरिका सिंह र टीसा शाक्य ५० मिटर फ्रिस्टायलमा क्रमशः २१ औं र २३ औं स्थानमा रहे । निर्धारित दूरी गौरिकाले २८.५० तथा टीसाले २९.६१ सेकेन्डमा पूरा गरे । प्रतिस्पर्धामा एसियाका ३१ खेलाडीले सहभागिता जनाएका थिए ।
त्यस्तै पुरुष ५० मिटर ब्रेस्टस्ट्रोकमा नेपालका शुभम् श्रेष्ठ सहभागी ३६ मध्ये ३२ औं भए । उनले निर्धारित दूरी तय गर्न ३२.४५ सेकेन्ड समय खर्चे । शिरिषको स्पर्धा यसअघि नै सम्पन्न भइसकेको छ ।
बक्सिङकी संगीता तथा ब्याडमिन्टनका रत्नजित र विकास पराजित
इन्डोनेसियमा जारी १८ औं एसियाली खेलकुदअन्तर्गत बक्सिङको पहिलो दिन नेपाली एक मात्र तिस्पर्धामा संगीता सुनार पराजित भएकी छन् । महिला ५७ केजीमा नेपालकी संगीता थाइल्यान्डकी खेलाडीसँग पराजित भएकी हुन् । उनी थाइल्यान्डकी निलावानसँग ५-० ले पराजित भएकी हुन् ।
बक्सिङमा नेपालबाट ५ पुरुष र ३ महिला गरी ८ खेलाडी सहभागी छन् । शनिबार तेजबहादुर देउवाले पुरुष ४९ केजी, भुपेन्द्र गुरुङले पुरुष ६४ केजी र पुनम रावलले महिला ६० केजीमा प्रतिस्पर्धा गर्नेछन् । बक्सिङ टोली थाइल्यान्डमा ४५ दिनको वैदेशिक प्रशिक्षणपछि एसियाडमा सहभागी हुन इन्डोनेसिया पुगेको थियो ।
ब्याडमिन्टनका रत्नजित र विकास पराजित
ब्याडमिन्टनको पुरुष सिंगल्समा नेपालका रत्नजित तामाङ र विकास श्रेष्ठ शुक्रबार पराजित भएका छन् । रत्नजित दक्षिण कोरियाका खेलाडी तथा विकास जापानका खेलाडीसंग २-० को सोझो सेटमा पराजित भएका हुन् । रत्नजित दक्षिण कोरियाका खेलाडीसाग २१-८ र २१-११ तथा विकास जापानका खेलाडीसँग २१-९ र २१-१० को सेटमा पराजित भएका थिए ।
त्यस्तै महिला डबल्समा नेपालकी अमिता गिरी र रशिला महर्जनको जोडीलाई दक्षिण कोरियाली जोडीले २१-७ र २१-१ ले सहजै हराए । नेपालले शनिबार दुई स्पर्धामा प्रतिस्पर्धा गर्नेछ । महिला सिंगल्समा नेपालकी नङशल तामाङले जापान तथा पुरुष डबल्समा नेपालका विकास श्रेष्ठ र नवीन श्रेष्ठको जोडीले इन्डोनेसियाका खेलाडी विरुद्ध खेल्नेछन् ।
म्याराथनतर्फ गोपीचन्द्र र कृष्णले दौड पुरा गर्न सकेनन्
एसियन गेम्स अन्तर्गत म्याराथनतर्फ नेपालका गोपीचन्द्र पार्की र कृष्ण बहादुर बस्नेतले दौड पुरा गर्न सकेनन् । शनिबार भएको खेलमा दुवैले ४० किमिको दौडपछि खेल त्यागेका थिए । इन्डोनेसियाको गर्मीको कारण खेलाडीलाई दौड पुरा गर्न गार्हो भएको भन्दै खेल त्यागेको खुल्न आएको छ ।
तर, खेल त्याग्नुको बिस्तृत जानकारी भने आएको छैन् । म्याराथनमा जापानका इनोई हिराटोले स्वर्ण जिते । सन् १९८६ पछि म्याराथनमा स्वर्ण जित्ने उनी पहिलो जापानिज खेलाडी बने । म्याराथनमा बहराइनका इल्साहन एलाबस्सीले रजत र चीनका डुओ बुझीले कास्य जिते ।
यो स्पर्धामा २१ खेलाडी रहेका थिए जसमा १५ खेलाडीले मात्र दौड पुरा गरे । इन्डोनेसियन एसियन गेम्समा एथलेटिक्सतर्फ नेपालका चार पुरुष र दुई महिला खेलाडीले प्रतिस्पर्धा गर्दै छन् । अब पुरुषतर्फ याम साजन सुनारले १०० मिटर दौड, सोम बहादुर कुमालले ४०० र ८०० मिटर दौडमा प्रतिस्पर्धा गर्नेछन् । महिलातर्फ सरस्वती भट्टराईले ८०० र १५०० मिटर दौड र विश्वरुपा बुढाले ५ हजार र १० हजार मिटरको दौडमा प्रतिस्पर्धा गर्ने छिन् ।
एसियाडमा नेपालको आशा गरिएको पदक गुम्यो
कराँतेमा आशा गरिएको पदक चुकेपछि १८ औं एसियाली खेलकुदमा नेपालले अझै पदकविहिन रहेको छ । कराँतेकी चन्चला दनुवारले एकल काँता तर्फ कांस्य पदक जित्ने सम्भावना रहेको थियो । तर, उनी कांस्य पदकका लागि भएको खेलमा थाइल्याण्डकि तारात्तानाकुल मोनिशासँग ५-० ले पराजित भएपछि नेपालले पदकविहिन यात्रा जारी राखेको हो ।
प्रतियोगिताको क्वाटरफाइनलमा मकाउकी सौ सोइलामसँग ५-० ले पराजित भएपनि चन्चलाले रेपेचेजबाट पदकसम्म पुग्ने मौका पाएकी थिइन् । उनले रेपेचेज फाइनलमा उत्तर कोरियाकी काङ जी उइलाई ३-२ ले पराजित गर्दै पदकको आशा दिलाएकी थिइन् । ३१ वर्षीय चन्चलाले थाई प्रतिद्वन्द्वी मोनिशासँग ५-० ले पराजित भइन् ।
नेपालले १८ औं एसियाडमा कुनै पदक जित्न सकेको छैन । पदकको आशा गरिएका उसु र तेक्वान्दो खाली हात फर्केपछि खालि हात हुने डर बढेको छ । कराँतेका खेल आजबाट सुरु भएको हो । कराँतेकै पुरुष एकल काँतातर्फ नेपालका परशुराम बास्तोला पहिलो चरणमा कतारका हाशेम आधामसँग ५-० ले पराजित भए ।
प्रकाशित: Dec 31, 2017| 18:23 आइतबार, पुस १६, २०७४