तेहरान- इरानको राष्ट्रपति पदका लागि उम्मेदवारी दिएका एलिरेज जाकिनी तहरानको मेयरमा निर्वाचित भएका छन्। इरानको प्रतिनिधि सभाको सांसदसमेत भइसकेका जाकिनी राजधानी तेहरान सहरको मेयरमा निर्वाचित भएका हुन्।
जाकिनी मेयरमा निर्वाचित भएको आइतबार घोषणा गरिएको छ। उनले आफ्नो नगरमा रहेका लागुऔषध दुर्व्यसनी, बाल मजदुरी, मगन्तेलगायतका समस्या समाधान गर्ने अठोट लिएका छन्।
लामो समयदेखि राजनीतिमा सक्रिय जाकानीले सन् २०१३, २०१७ र २०२१ मा राष्ट्रपतिका लागि उम्मेदवारी घोषणा गरेका थिए।
सन् २०१३ र २०१७ मा उनको उम्मेदवारीलाई आधिकारीक निकायले अयोग्य घोषणा गरेको थियो भने हालै सन् २०२१ मा भने उनले अन्तिम समयमा उम्मेदवारी फिर्ता लिएका थिए।
राष्ट्रपतिमा निर्वाचित इब्राहिम रायसीलाई समर्थन गर्दै उनले उम्मेदवारी फिर्ता लिएका थिए। रायसीलाई निर्वाचित गराउन उनले प्रमुख प्रचारकको रूपमा भूमिका खेलेका थिए। त्यसको बदलामा रायसीले पनि जाकानीलाई निर्वाचित गराउन भूमिका खेले।
५५ वर्षका जाकानीका श्रीमती र तीन सन्तान छन्। तेहरान चिकित्सा शिक्षा विश्वविद्यालयमा अध्ययन गरेका जाकानी इरानी अनलाइन पत्रिका र साप्ताहिक पत्रिकाको सञ्चालकसमेत हुन्। रासस