आजका अखबार : मधेसलाई फकाउँदै ओली 

काठमाडौं- राजधानीबाट प्रकाशित आइतबारका राष्ट्रिय दैनिक अखबारहरुले विविध विषयका खबरलाई पहिलो प्राथमिकतामा पारेका छन् । 

कसैले प्रधानमन्त्री केपी ओलीले प्रदेश २ मा गरेको सम्बोधनलाई मुख्य समाचार बनाएका छन् भने कसैले तीन तहका सरकारबीचको विवाद मिलाउने निकाय नबनेको विषयलाई प्राथमिकतामा पारेका छन् । 

मधेसप्रति कठोर मानिने प्रधानमन्त्री ओलीले प्रदेश २ को सभालाई सम्बोधन गर्दै आफू मधेस विरोधी नभएको दावी गरेका छन् । उसले सम्बोधनका क्रममा विभिन्न विकास आयोजनाको आश्वासन बाड्नेदेखि संविधान संसोधनकै विषयमा पनि लचकता देखाएर मधेसलाई फकाउन खोजेको आजका पत्रपत्रिकाले लेखेका छन् । 

नागरिक दैनिकले 'म मधेसविरोधी होइन' शीर्षकमा उनको खबर लेखको छ भने कान्तिपुरले 'संविधान धर्मशास्त्र होइन' शीर्षकमा समाचार प्रकाशित गरेको छ । नयाँ पत्रिका दैनिकले पनि 'प्रदेश २ सभामा प्रधानमन्त्रीको सम्बोधन : संविधान धर्मशास्त्र होइन, संसोधन हुन्छ' शीर्षकमा खबर छापेको छ । 

आजको कान्तिपुरले केन्द्र प्रदेश र स्थानीय तहबीच राजस्वलगायत विषयमा विवाद सुरु भइसके पनि समाधानका लागि संविधानले तोकेका संरचनालाई सरकारले वेवास्ता गरेको खबर लेखेको छ ।

सरकारले यस्तो संरचना बनाउनको साटो संविधानले परिकल्पना गरेको संरचनाबाहिर गएर सचिवस्तरीय कार्यदल वा समिति बनाउन थालेको छ । अहिलेसम्म वित्त आयोग बनेको छैन् भने अन्तर प्रदेश परिषद्को बैठक अहिलेसम्म बोलाइएको छैन् । प्रदेश समन्व्य परिषद्को बैठक पनि अहिलेसम्म बस्न नसकेको कान्तिपुरले उल्लेख गरेको छ । 

नागरिक दैनिकले भने अब्बल स्थानीय सरकार शीर्षकमा मुख्य खबर छापेको छ । केहि नगरपालिकाले शिक्षा, सामाजिक सुरक्षा, खानेपानी, सडक, विद्युत, कृषिलगायत क्षेत्रमा गरेको सुधारका कामबाट नागरिक आशावादी देखिएको उसले लेखेको छ । 

आजको नयाँ पत्रिका दैनिकले भने पेट्रोल ६२ रुपैयाँमा किनेर ११० मा बेच्दा पनि निगमलाई घाटा शीर्षकमा मुख्य समाचार छापेको छ । नेपाल आयल निगमलाई १५ दिनमा एलपी ग्यासमा साढे ३३ करोड, डिजेलमा १६ करोड र पेट्रोलमा ३३ लाख घाटा भएको समाचारमा जनाइएको छ ।

सबैभन्दा गरिब र उपेक्षितले प्रयोग गर्ने मट्टितेलबाट भने निगमले नाफा कमाएको उसले उल्लेख गरेको छ । इन्धन किन्दा एक वर्षमा नेपालबाट १५२ अर्ब रुपैयाँ भारत जाने गरेको र सरकारले भने जम्मा ५५ अर्ब रुपैयाँ उठाउने गरेको नयाँ पत्रिकाले खबर लेखेको छ ।