पारसले लगाउने गरेको जर्सी नम्बर क्यानले कुनै खेलाडीलाई नदिने

काठमाडौं– नेपाली राष्ट्रिय टिमका पूर्वकप्तान पारस खड्काको खेल जीवन र उनले दिएको योगदानलाई कदर गर्दै नेपाल क्रिकेट संघ (क्यान) ले जर्सी नम्बर ७७ अब प्रयोग नगर्ने बताएको छ।

क्यानले आज आइतबार सूचना जारी गर्दै पारसले लगाउने गरेको जर्सी नम्बर ७७ प्रयोगबाट बाहिर राख्ने जनाएको हो।

‘पारस खड्काको योगदानको सम्मानस्वरुप क्यानले ७७ नम्बरको जर्सी प्रयोगमा नल्याउने भएको छ,’ क्यानले  जारी गरेको सूचनामा लेखिएको छ।

नेपाली राष्ट्रिय टिमका पूर्वकप्तान खड्काले राष्ट्रिय टिमबाट ७७ नम्बरको जर्सी लगाउने गर्थे। उनको कप्तानीमा नेपाली क्रिकेट डिभिजन फाइभबाट एक दिवसीय राष्ट्रका रुपमा स्थापित भएको छ।

उनले राष्ट्रिय टिमबाट नेपालका लागि निकै लामो र नतिजामुखी योगदान दिएका छन्। उनकै कप्तानीमा नेपालले २०१४ मा बंगलादेशमा आयोजित टी–२० विश्वकप पनि खेलेको थियो।