अक्सिजन सिलिण्डर भरेर तयारी अवस्थामा राख्न स्वास्थ्य मन्त्रालयको निर्देशन

काठमाडौं- कोरोना संक्रमणको सम्भावित तेस्रो लहरलाई मध्यनजर गर्दै स्वास्थ्य तथा जनसंख्या मन्त्रालयले अक्सिजन व्यवस्थापनलाई प्रभावकारी बनाउने काम अघि बढाएको छ।

मन्त्रालयले खाली अक्सिजनका सिलिण्डर भरेर राख्न र बिग्रिएका प्लान्टहरु बनाउन निर्देशन दिएको छ। खाली अक्सिजन सिलिण्डर भर्ने, ट्यांकी विग्रिएको भए बनाउने र अपुग भएमा खरिद गरी तयारी अवस्थामा राख्न निर्देशन दिएको मन्त्रालयको गुणस्तर मापदण्ड महाशाखाका प्रमुख डा. मदन उपध्यायले जानकारी दिए।

आकस्मिक प्रयोगका लागि सबै प्रदेशमा १ हजार अक्सिजन सिलिण्डर र स्वास्थ्य सेवा विभागमा २ हजार सिलिण्डर भरेर राख्न भनिएको उनले बताए। स्वास्थ्य मन्त्रालयले असोज १५ देखि तेस्रो लहरको सम्भावना भएको र अबको ५ महिनामा करिब २ लाख संक्रमित थपिने मन्त्रालयको आंकलन छ।