बस र ट्रक ठोक्किएर दुर्घटना : चारको मृत्यु

चितवन- म‌गलबार राति चितवनमा बस र ट्रक ठोक्किएर भएको दुर्घटनामा परी चार जनाको मृत्यु भएको छ । १७ जना घाइते भएका छन् । 

पूर्वबाट नारायणगढतर्फ आउँदै गरेको ना५ख ५९४१ नम्बरको ट्रक र काठमाडौँबाट काँकडभिट्टातर्फ जाँदै गरेको मकालु यातायातको ना६ख १७४१ नम्बर बस पूर्वपश्चिम राजमार्गको रत्ननगर नगरपालिका–१० भानुचोकमा एकापसमा ठोक्किँदा भएको दूर्घटनामा परी चार जनाको मृत्यु भएको चितवनका प्रहरीइ नायव उपरीक्षक प्रभुप्रसाद ढकालले जानकारी दिए । 

दुर्घटनामा परी रौतहट चपुरका ट्रक चालक ३४ वर्षीय मोहन घिसिङ, सोही ठाउँका ट्रकका सहचालक ३० वर्षीय बुद्धिमान लामा, बसमा सवार काठमाडौँ थानकोटका ४८ वर्षीय विष्णुप्रसाद थापा र ताप्लेजुङ खुम्लिङ नगरपालिका–१ का ४२ वर्षीया तारा बरालको मृत्यू भएको छ । गम्भीर घाइते भएका चारै जनाको उपचारका क्रममा मृत्यू भएको ढकालले बताए । घाइतेको पुरानो मेडिकल कलेज तथा चितवन मेडिकल कलेजमा उपचार भइरहेको छ ।

इँटा बोकेर फर्किँदै गरेको ट्रक बससित ठोक्किएको थियो ।