आजका अखबार : प्रहरीले नै सूचना लुकाउँदा अपहरित बालकको हत्या

काठमाडौं- राजधानीबाट प्रकाशित राष्ट्रिय दैनिक अखबारहरुले स्कूले बालकको अपहरणपछि हत्या भएको विषयलाई मुख्य समाचार बनाएका छन् । 

काठमाडौं काँडाघारीका ११ वर्षीय स्कूले बालक निशान खड्काको अपहरण भएको २४ घण्टा नबित्दै अपहरकारीले हत्या गरेका हुन् । बाललको हत्या गर्ने अपहरणकारी गोपाल तामाङ र अजय तामाङलाई भने प्रहरीले इन्काउन्टरमा मारेको छ । 

यसैविषयलाई मुख्य समाचार बनाउदै आजको अन्नपूर्ण पोस्ट्ले 'स्कूले बालकको अपहरणपछि हत्या' शीर्षकमा खबर लेखेको छ भने नागरिक दैनिकले 'अपहरणपछि बालकको हत्या' शीर्षकमा खबर छापेको छ ।

दुबै पत्रिकाले अपहरणकारी इन्काउन्टरमा मारिएको विषय पनि उल्लेख गरेका छन् । बालकको अपहरण गरि हत्या गर्ने व्यक्तिहरु बालककै आमाले काँडाघारीमा सञ्चालन गर्दै आएको चियापसलको नियमित ग्रहक भएको पनि पत्रपत्रिकाले प्रहरीलाई उदृत गर्दै जनाएका छन् । 

कान्तिपुर दैनिकले 'राजधानीमै बालकको अपहरण र हत्याः किन बचाउन सकेन प्रहरीले ?' शीर्षकमा मुख्य समाचार लेखेको छ । बालक बस्ने डेराबाट उनको हत्या भएको स्थान केहि किलोमिटर मात्रै टाढा भएपनि प्रहरीले उनलाई जिवितै उद्धार गर्न नसक्नुको पछाडी प्रहरीबीच नै समन्व्य हुन नसक्नु र सुचना लुकाउन खोज्नु मुख्य कारण भएको कान्तिपुरले उल्लेख गरेको छ ।

प्रहरी परिसर काठमाडौं र महानगरीय प्रहरी अपराध महाशाखा दुबै सुचना लुकाउने र सकेसम्म आफै अपहरणकारी पत्ता लगाउँ भन्ने प्रतिस्पर्धाले अनुसन्धान कमजोर भएको कान्तिपुरले जनाएको छ ।  

आजको नयाँ पत्रिकाले भने अपहरणकारी मात्रै होइन, प्रमाण मारियो शीर्षकमा प्रमुख खबर छापेको छ । उसले अपहरणकारी मार्ने प्रहरीको प्रशंसा गरिए पनि बालक किन बचाउन सकिएन भन्ने मूल प्रश्न ओझेलमा परेको समाचारमा जनाएको छ । प्रायोजित इन्काउन्टरले अपराधको उद्देश्य छोपिएको पनि जनाएको छ । नयाँ पत्रिकाले प्रहरीमा नयाँ हाकिम आउनासाथ कम्तिमा एक इन्काउन्टर निश्चित शीर्षकमा अर्को खबर पनि लेखेको छ ।
 
बालकको अपहरणपछि हत्या भएको विषय बाहेक आजका पत्रपत्रिकाले अरु विषयलाई सामान्य महत्व दिएका छन् । आजको अन्नपूर्णले सम्पति शुद्धिकरण अनुसन्धान विभागले विदेशीको शंकास्पद सम्पत्तिमाथि छानविन सुरु गरेको विषयलाई एङ्कर न्युज बनाएको छ । 

नयाँ पत्रिकाले वर्षमा २३ खर्बका बस्तु उपभोग हुने गरेको र जसमध्ये साढे १२ खर्ब विदेशी आयातीत बस्तु हुने गरेको खबर लेखेको छ । जथाभावि संरचनाले जाजरकोटको खलंगा असुरक्षित भएको खबरसंगै कान्तिपुर दैनिकले मुलुकि ऐन संसोधन भएसंगै अब बहुविबाह र बाल विवाह गरे रद्द हुने खबर पनि पहिलो पृष्ठमा छापेको छ ।