काठमाडौं- राजधानीबाट प्रकाशित बुधबारका राष्ट्रिय दैनिक अखबारहरुले प्रधानन्यायाधीशमा सिफारिस दीपकराज जोशीको नाम अस्विकृत गर्ने तयारी भएको विषयलाई मुख्य समाचार बनाएका छन् ।
संसदीय सुनवाइ समितिमा प्रतिनिधित्व गर्ने सत्तारुढ दलका सांसदहरुले 'माथिल्लो आदेश' बमोजिम प्रस्तावित प्रधानन्यायाधीश जोशीको नाम अस्विकृत गर्ने तयारी गरेका छन् । समितिको आज बस्ने बैठकमा सकेसम्म कांग्रेसका सदस्यहरुको समेत सहमतीमा सर्वसहमत रुपमा अस्विकार गर्ने नभएमा दुईतिहाइ मतको प्रयोग गरेर भएपनि जोशीको नाम अस्विकृत गर्ने तयारी भएको आजका पत्रपत्रिकाले लेखेका छन् ।
'प्रमाणपत्र नै जोशीविरुद्ध प्रमाण' शीर्षकमा मुख्य समाचार छापेको नयाँ पत्रिकाले परस्पर विरोधी शैक्षिक प्रमाणपत्रको चक्रब्यूहमा प्रस्तावित प्रधानन्यायाधीश फसेको उल्लेख गरेको छ ।
कान्तिपुर दैनिकले 'प्रमाणपत्रका तथ्यै फरक-फरक' शीर्षकमा खबर लेखेको छ । जोशीले समितिमा बुझाएको प्रमाणपत्रको विवरण परिक्षा नियन्त्रण कार्यालय र विजय मेमोरियल स्कूलसंग मेल नखाएको, जोशीले आफ्नो भनि दाबी गरेको सिम्बोल नम्बर ३६६७ मा अर्कै परिक्षार्थी हिमबहादुर लेकालीको नाम रहेको पनि कान्तिपुरले खुलासा गरेको छ ।
आजको नागरिक दैनिकले भने 'संसदीय सुनुवाइ निर्णायक मोडमा : जोशीविरुद्ध थप प्रमाण' शीर्षकमा एङ्कर न्युज बनाएर छापेको छ । अन्नपूर्ण पोस्ट्ले भने यो विषयलाई पहिलो पृष्ठमा स्थान दिएको छैन् ।
'बिमस्टेकमा मोदी आउने' शीर्षकमा मुख्य समाचार छापेको अन्नपूर्णले भदौ १४ र १५ गते काठमाडौंमा हुने सम्मेलनमा मोदीसहित सबै सदस्य राष्ट्रका कार्यकारी प्रमुख सहभागी हुने जनाएको छ ।
यस्तै उसले नेपालको अध्यागमनको सुरक्षा अवस्था कमजोर भएको खबर पनि लेखेको छ । प्रभावकारी सफ्टवेयर नहुँदा मानव तस्करलाई सहज भएको अन्नपूर्णले उल्लेख गरेको छ ।
नागरिक दैनिकले आर्थिक वर्षको अन्त्यमा अन्धाधुन्द खर्च भएको रकममा ठूलो भ्रष्टाचार भएको खुलासा गरेको छ । असार अन्तिम साता दैनिक अर्बौ रुपैया भुक्तानी हुनु र कर्मचारी लाखौं घुससहित पक्राउ पर्नु संयोग मात्रै नभएको उसले लेखेको छ । नागरिक दैनिकले खुम्चिदो नागरिक अधिकारप्रति अमेरिका चिन्तित बनेको पनि खबर छापेको छ ।
कान्तिपुरले नेपाल एकदिवसीय अन्तर्राष्ट्रिय क्लवमा प्रवेश गरेको र नयाँ पत्रिकाले १७ वर्ष भित्र ठूला जहाज १७ पुर्याउने तयारी वायुसेवा निगमको रहेको विषयलाई पहिलो पृष्ठमा महत्वका साथ छापेका छन् ।
प्रकाशित: Dec 31, 2017| 18:23 आइतबार, पुस १६, २०७४