काठमाडौं–अखिल नेपाल फुटबल संघ (एन्फा)ले आसन्न 'एसियाड गेम्स' र 'साफ च्याम्पियसिप'को बन्द प्रशिक्षणमा रहेका पाँच खेलाडीलाई ७२ घण्टे स्पष्टिकरण सोधेको छ ।
शुक्रबार राति डिस्को गएर मादक पदार्थ सेवन गरी हो-हल्ला गरेको भन्ने समाचार सार्वजनिक भएपछि नेपाली फुटबल टोलीका स्टाइकर विमल घर्तीमगर, अन्जन विष्ट, विशाल राई, हेमन्त थापामगर र छिरिङ शेर्पालाई स्पष्टिकरण सोधेको हो ।
एन्फाले टोलीका प्रशिक्षक, होस्टल वार्डेन र सेक्युरिटी कम्पनीसँग पनि स्पष्टिकरण मागेको छ ।
एन्फा अध्यक्ष कर्मा छिरिङ र अन्य पदाधिकारीले पाँच खेलाडीसँग मौखिक स्पिष्टिकरण लिएपछि लिखित स्पिष्टिकरण पनि मागेको हो ।
एन्फाले टोलीका व्यवस्थापक बाबुकाजी बस्नेत, होस्टेल वार्डेन टक्कर थापालाई तीन दिन र सेक्युरिटी कम्पनी गुरुडलाई सात दिन भित्र लिखित जवाफ पेश गर्न निर्देशन दिइएको छ ।
स्पस्टिकरण लिएको एक दिन बितेपछि कसैले लिखित जवाफ नलेखेको एन्फाका प्रवक्ता किरण राईले जानकारी दिए । 'सोमबार खेलाडीसँग मौखक स्पष्टिकरण सोधिएको छ,' प्रवक्ता राईले भने,' थप प्रष्ट हुनका लागि ७२ घण्टाभित्र लिखित स्पष्टिकरण दिनुपर्ने हुन्छ । सोही लिखित स्पष्टिकरण पछि खेलाडीमाथि हुने कारवाहीका विषयमा छलफल हुनेछ ।'
एन्फाको सीसी टिभि फुटेजका आधारमा खेलाडीलाई स्पष्टिकरण सोधिएको प्रवक्ता राईले बताए ।
प्रकाशित: Dec 31, 2017| 18:23 आइतबार, पुस १६, २०७४