गाउँ परिषदको विरोध गरेपछि राजपा कार्यकर्ताबीच कुटाकुट

जनकपुरधाम- महोत्तरीस्थित पिपरा गाउँपालिकाको गाउँ परिषदमा झडप भएको छ । राष्ट्रिय जनता पार्टी (राजपा)बाट अध्यक्षमा निर्वाचित विनोद चौधरीले जर्बजस्ती गरेको भन्दै आफ्नै पार्टीका कार्यकर्ताले विरोध गरेपछि झडप भएको हो । 

झडमा परी राजपाका पिपरा गाउँ इकाई कमिटी अध्यक्ष विनित पाण्डेय, वीरेन्द्र कापर, नरेश ठाकुर, हरि साह, वकिल दास लगायतका व्यक्तिलाई चोटपटक लागेको छ । परिषदका प्रमुख अतिथि नवनियुक्त राज्यमन्त्री अभिराम शर्मा उपस्थित रहेकै बेला दुई पक्षबीच झडप भएको थियो ।

गाउँपालिका अध्यक्ष चौधरीले पार्टीसँग छलफल नै नगरी परिषद गर्न खोजेको भन्दै आफ्नै पार्टी राजपाका गाउँ इकाई कमिटीले वहिष्कार गर्ने निर्णय गरेको थियो । पार्टीको विरोधकाबीच परिषद गर्न खोजेपछि असन्तुष्टहरुले परिषदस्थलमा विरोध प्रदर्शन गरेको थियो ।
  
आफूहरुले परिषको विरोध गरेपछि अध्यक्ष चौधरीले आफ्नो मान्छे र प्रहरी लगाई कुटपिट गरेको राजपाका गाउँ इकाई कमिटी अध्यक्ष पाण्डेयको आरोप छ ।

गाउँपालिका अध्यक्ष चौधरीले जनताको भावना विपरित आफू अनुकूल योजनाहरु समावेश गरी जर्बजस्ती परिषद गर्न खोजेकोले वाध्य भएर विरोधमा उत्रिनु परेको राजपाका गाउँपालिका इकाई कमिटीका अध्यक्ष पाण्डेयले बताएका छन् । परिषदबारे गाउँपालिका अध्यक्षले अन्य पार्टीलाई समेत आधिकारिक जानकारी नगराएको पाण्डेयले जानकारी दिए । 

गाउँपालिका अध्यक्षले जर्बजस्ती गरेको परिषदका निर्णयहरु आफूहरुले कुनै हालतमा स्वीकार नगर्ने उनले बताए ।