एजेन्सी–स्पेनिस ला लिगा च्याम्पियन बार्सिलोनाले युरोपियन फुटबलको नयाँ सिजन शुरु हुनु अघिको प्रि–सिजन अन्तरगतको इन्टरनेसनल च्याम्पियन कप फुटबलमा विजयी शुरुवात गरेको छ । अमेरिकाको पासाडेनास्थित स्टेडियममा भएको खेलमा इंग्लिस क्लब टोटनह्यामलाई पेनाल्टी सुटआउटमा ५–३ ले पराजित गर्दै च्याम्पियन कपमा विजयी शुरुवात गरेको हो ।
निर्धारित समयको खेल २–२ गोलको बराबरीमा सकिएपछि खेल पेनाल्टी सुटआउटमा धकेलिएको थियो । जसमा बार्सिलोनाले बाजी मारेको हो । १५ औं मिनेटमा मुनिर एल हाडाडीले गोल गर्दै बार्सिलोनालाई अग्रता दिलाएका थिए ।
२९ औं मिनेटमा बार्सिलोनाबाट डेब्यु गरेका अर्थुर मेलोले डेब्यु गोल गरेपछि बार्सिलोना २–० ले अघि बढेको थियो । पहिलो हाफमा २–० ले अघि रहेको बार्सिलोनाले दोस्रो हाफमा दुई गोल खान पुग्यो ।
७३ औं मिनेटमा ह्युङ मिन सनले गोल गर्दै खेललाई २–१ मा ल्याएका थिए । ७५ औं मिनेटमा जर्जेस एन कोउडोले गोल गरेपछि खेल २–२ गोको बराबरीमा पुगेको थियो । त्यसपछि थप गोल हुन नसक्दा खेल पेनाल्टी सुटआउटमा धकेलिएको थियो ।
प्रकाशित: Dec 31, 2017| 18:23 आइतबार, पुस १६, २०७४