मन्त्रीको जवाफ चित्त नबुझेपछि संसद् बैठक अवरोध

काठमाडौं– प्रतिनिधि सभामा शुक्रबार शिक्षा मन्त्री गिरिराजमणि पोखरेलले डा. गोविन्द केसीसँग भएको सहमतिबारे दिएको जानकारी चित्त नबुझेपछि प्रमुख प्रतिपक्षी कांग्रेसले बैठक अवरोध गर्दै, खोल्दै गरिरहेको छ । 

मन्त्री पोखरेलले डा. केसीसँग भएका सहमतिका बुँदा स्पष्ट रूपमा सांसदहरूलाई जानकारी नगराएपछि कांग्रेसले बैठक अवरुद्ध गरेको हो । मन्त्री पोखरेलले सहमतिका बुँदा मन्त्रिपरिषद्ले पारित गर्ने र कार्यान्वयनमा जाने बताए । उनले ती बुँदा संसद्मा टेबल गर्ने पनि बताए । 

कांग्रेस सांसदहरूले सहमति पत्र आफूहरूले पनि पढ्न पाउनुपर्ने भन्दै नियमापत्ति गरे । कांग्रेस प्रमुख सचेतक बालकृष्ण खाँडले मन्त्रीको जवाफ गोलमटोल भएको बताए । विवादका बीच संसद् बैठक १० मिनेटका लागि स्थगित भएको छ ।