'चिकित्सा शिक्षा विधेयक चाँडै संसदमा पेश हुन्छ'

जनकपुरधाम- सरकारले ल्याउन लागेको चिकित्सा शिक्षा विधेयकको विरोधमा डा.गोविन्द केसी १५ औँ पटक अनशनमा छन् । विधेयकको विरोधमा अनशन बस्न जुम्ला पुगेका केसीलाई प्रहरीले जर्बजस्ती काठमाडौं ल्याएर अस्पताल भर्ना गराएका छन् । 

यता केसीको समर्थनमा तरुण दल देश भर सडक तताउँदै छ । केसीको समर्थनमा चौतर्फी समर्थन जुटेको बेला सरकारका एकजना प्रभावशाली मन्त्रीले विधेयक छिट्टै संसदमा पेश हुने दाबी गरेका छन् । 

गृहमन्त्री रामबहादुर थापा बादलले राष्ट्रिय चिकित्सा शिक्षा विधेयक छिट्टै संसदमा पेश गर्ने सरकारको तयारी रहेको बताएका छन् । कार्यक्रममा सहभागी हुन सर्लाही पुगेका गृहमन्त्री बादलले जनकपुर विमानस्थलमा सञ्चारकर्मीहरुसँग कुराकानी गर्दै लोकतान्त्रिक विधि अनुसार डा.केसीको माग सम्बोधन हुने उल्लेख गरे ।

'डा.केसीको मागप्रति सरकार गंभीर छ,' गृहमन्त्री बादलले भने, 'लोकतान्त्रिक विधि अनुसार उहाँको माग पुरा हुन्छ, चिन्ता गर्नु पर्दैन् ।' देश विकास र समृद्धितर्फ अगाडी बढि रहेको बेला केहि राजनीतिक दलले अस्थिरता पैदा गर्न खोजेको उनको आरोप थियो ।

प्रदेश सरकारले छलफलका लागि प्रदेशसभामा पेश गर्न लागेको प्रदेश प्रहरी ऐनप्रति गृहमन्त्री थापाले आपत्ति जनाए । प्रदेश प्रहरी ऐन बनाएर लागु गराउन खोज्नु संघीय प्रहरी ऐन विपरित रहेको मन्त्री थापाको भनाइ थियो ।

'प्रदेश सरकारले संघीय सरकार विरुद्ध काम गरेको छ,' बादलले भने,'संघीय प्रहरी ऐन पारित हुन सकेको छैन् । संघीय प्रहरी ऐन पारित नै नभई प्रदेशले प्रहरी ऐन ल्याउनु वा संसदमा दर्ता गर्नु संघीय प्रहरी ऐन विरुद्ध हो ।'

गृहमन्त्री बादलले मुलुकमा अमन चयन र शान्ति सरकारको पहिलो प्राथमिकता रहेको बताउँदै भ्रष्टाचार नियन्त्रण गर्न शून्य सहनशीलता अपनाइने दाबी गरे । वर्षौदेखि रोकिएका विकास निर्माणका काम सञ्चालन गर्नुका साथै यातायातमा रहेको सिन्डिगेट अंत्यगर्न सरकार प्रतिवद्ध रहेको दाबी गरे ।