जनकपुरधाम–भारतीय प्रधानमन्त्री नरेन्द्र मोदी जनकपुर आउने निश्चित भएपछि प्रदेश सरकारदेखि जनकपुर उपमहानगरपालिकाले सरसफाई तथा सौन्दर्यीकरण जस्ता कार्यलाई प्राथमिकतामा राखेको थियो । विदेशी पाहुनाको स्वागत र सम्मानमा कुनै कसर बाँकी राख्नु हुन्न भन्दै दुबै निकायले आ–आफ्नो कार्यक्रम र योजनाहरु छुट्टाछुट्टै कार्यक्रम बनाए ।
अतिथीको सामुन्ने जनकपुरबारे सकारात्मक छाप छोड्न अरु केहि नभएपनि सरसफाई र सौन्दर्यीकरण कार्यगर्न उनीहरुले भग्मग्दुर प्रयास नगरेका पनि होइनन् । वर्षौदेखि जीर्ण रहेको मोदीको गाडी गुड्ने बाटो २४ घण्टा भित्रै तयार पारियो । एसियाली विकास बैंकको ऋण अनुदानमा सञ्चालित एकीकृत शहरी विकास आयोजना अन्तर्गत परेको जानकी मन्दिर–रामानन्द चोक उक्त सडक खण्ड अहिले भत्काएर पुनः निर्माण हुँदैछ ।
मोदीलाई अभिनन्दन गर्न प्रदेश सरकारले सात करोड बढी र उपमहानगरपालिकाले करिब दुई करोड रकम खर्च गरेको बताइन्छ । यद्यपी प्रदेश सरकारले अझै खर्चको यथार्थ विवरण भने सार्वजनिक गरेको छैन् ।
तर, उपमहानगरपालिकाले मोदी जनकपुर आउँदा जानकी मन्दिर र राम मन्दिर सौन्दर्यीकरण गर्न ४६ लाख भन्दा बढी रकम खर्च भएको जनाएको छ । उपमहानगरपालिकाले नगर परिषदमा सार्वजनिक गरेको आयव्ययको विवरणमा जानकी मन्दिर र राम मन्दिर सौन्दर्यीकरण गर्न ४६ लाख ६१ हजार ८८६ रुपैया खर्च भएको जनाइएको छ । उक्त शीर्षकमा उपमहानगरपालिकाले ५० लाख रुपैयाँ विनियोजन गरेको थियो ।
तर, जानकी मन्दिरलाई सौन्दर्यीकरण गर्ने कुनै काम नभएको मन्दिरले जनाएको छ । जानकी मन्दिरका छाटे महन्त रामरोशन दासले मन्दिर सौन्दर्यीकरण जस्ता कुनै कार्य भएको आफूलाई जानकारी नरहेको बताए । वर्षाको कारण जानकी मन्दिरको पूर्वतर्फ रहेको भत्केको पर्खाल निर्माण बाहेक अन्य कुनै काम भएको आफ्नो जानकारीमा नरहेको उनको भनाई छ ।
भारतीय प्रधानमन्त्री मोदी जनकपुर आउँदा उपमहानगरपालिकाले सौन्दर्यीकरण कार्यको संयोजक उपप्रमुख रीता झालाई बनाएको थियो । उपप्रमुख झाले पनि रकम खर्च भएको बारे आफूलाई कुनै जानकारी नरहेको बताएकी छिन् ।
‘कुन शीर्षकमा कति रकम खर्च भयो, संयोजक रहेपनि मलाई थाह भएन,’ नेपाल समयसँगको कुराकानीमा झाले भनिन्,‘सडक छेउको पर्खाल रंङ्गरोगन, मिथिला पेन्टिङ्ग लगायतको कार्यमा पैसा खर्च भएको छ । तर, यथार्थ खर्च बुझ्नै पर्नेछ । कुन कामको लागि कति खर्च भयो योजना शाखालाई थाह हुन्छ, त्यहाँबाट बुझ्दै छु ।’
मोदी भ्रमणको क्रममा उपमहानगरपालिकाले जानकी मन्दिरस्थित विवाह मण्डपको पर्खाल तथा अभिनन्दनस्थल रंगभूमि मैदानको दक्षिणतर्फको पर्खालमा रंङ्गरोगन र मिथिला पेन्टिङ्ग गर्न लगाएको थियो । मिथिला पेन्टिङ्ग गर्न काठमाण्डौबाट बोलाइएका कलाकारहरुलाई करिब २० लाख दिइएको बताइएको छ ।
प्रकाशित: Dec 31, 2017| 18:23 आइतबार, पुस १६, २०७४