काठमाडौं- महानगरीय प्रहरी परिसर काठमाडौं र ललितपुरले शुक्रबार आर्थिक वर्ष ०७४-७५को अपराधको तथ्यांक सार्वजनिक गरेका छन्।
तथ्यांकअनुसार काठमाडौंमा लागूऔषध सेवन र ओसारपसारका घटना बढी देखिएका छन्। ललितपुरमा भने आत्महत्याको दर व्हात्तै बढेको देखिएको छ।
ललितपुर प्रहरीले सार्वजनिक गरेको विवरणमा गत आवमा ९३ जनाले आत्महत्या गरेका छन्। जसमा १६ देखि २६ वर्ष उमेर समूहको संख्या बढी छ। काठमाडौं प्रहरीका अनुसार लागूऔषध ओसारपसार र प्रयोगकर्ता विगतको तुलनामा तीन गुणाले वृद्धि भएको पाइएको छ।
दुवै जिल्लामा सार्वजनिक अपराधको मुद्दा दर्ता पनि बढेको पाइएको छ। अपहरण तथा शरीर बन्धक, संगठित अपराध र विष्फोटका घटना भने दुवै जिल्लामा केही कम देखिएको छ । गत आवमा साइबर क्राइममा पनि बढोत्तरी पाइएको छ।
गुण्डागर्दी तथा अवैध हतियार नियन्त्रण आफूहरूको मुख्य प्राथमिकता रहेको काठमाडौं र ललितपुरका एसएसपीद्वय विश्वराज पोखरेल र गणेशबहादुर ऐरले बताए। मानव बेचविखन तथा ओसापसारमा विगतको तुलनामा कमी आए पनि घरेलु हिंसाका घटना भने बढेको उनीहरूको भनाइ छ।
प्रकाशित: Dec 31, 2017| 18:23 आइतबार, पुस १६, २०७४