काठमाडौं- वीर अस्पतालस्थित राष्ट्रिय स्वास्थ्य विज्ञान प्रतिष्ठानका रेजिडेन्ट डाक्टरहरूले डा. गोविन्द केसीको जीवन रक्षाको माग गर्दै स्वास्थ्य मन्त्रालयभित्रै प्रदर्शन गरेका छन् ।
मन्त्रालय परिसरमै पसेर उनीहरूले सरकारविरुद्ध नाराबाजी गरेका हुन् । 'सरकारको घडीमा माफियाको ब्याट्री', 'तिम्रो मार्सी भोजनले समाजवाद आउँदैन', 'मार्सी धानको भातसँग ऐन साट्न पाइँदैन', 'ओली सरकार हाई हाई, सरकार माफिया बाई बाई', 'डा. केसीको जीवन रक्षा गर', 'आऊ आऊ जनता उर्लेर आऊ, डीकेसीको ज्यान बचाऊ'जस्ता नारा उनीहरूले लगाएका थिए ।
जुम्ला पुगेर डा. केसी आमरण अनशन बसेको आज १८ औं दिन हो । नयाँशक्ति पार्टीले पनि मंगलबार डा. केसीको जीवन रक्षा माग गर्दै माइतीघर मण्डलामा प्रदर्शन गरेको छ ।