चार महिनादेखि शिक्षकले पाएनन् तलब

जनकपुरधाम- मुलुक संघीय संरचनामा प्रवेश गरेसँगै सामुदायिक विद्यालयहरु स्थानीय तह मातहत गएका छन्। स्थानीय तह जानुपूर्व नियमित तलब पाउँदै आएका धनुषास्थित केहि स्थानीय तहका शिक्षकहरु भने विगत चार महिनादेखि रित्तै काम गर्ने अवस्था छ।

धनुषाको धनौजी गाउँपालिका मातहत रहेका विद्यालयका शिक्षकहरु तलबै नपाई पछिल्लो चार महिनादेखि काम गर्दै आइरहेका छन्। कोष तथा लेखा नियन्त्रक कार्यालयले निकासा गरिसकेपनि स्थानीय तहले भने शिक्षकहरुलाई चार महिना देखि तलब नदिएको बहुअर्बा माविका प्रधानाध्यापक तपेश्वर मल्लिकले बताए।

मल्लिकका अनुसार स्थानीय तहले पछिल्लो चार महिनादेखि तलब निकासा नगरेपछि गाउँपालिकाका शिक्षकहरु विच्चलीमा परेका छन्। तलबको लागि पटक-पटक तागेता गरेपनि कुनै सुनवाई नभएको शिक्षकहरु बताउँछन्।

गाउँपालिकाको कार्यकारी अधिकृत र लेखा अधिकृतबीच समन्वयकारी व्यवहार नहुँदा शिक्षकहरुले तलब पाउन नसकेको शिक्षकहरुले गुनासो गरेका छन्। आर्थिक वर्ष सकि सक्दा समेत गाउँपालिकाले तलब निकासा नगरेपछि शिक्षकहरुको सञ्चय कोष दाखिला हुन सकेको छैन्। सञ्चय कोष दाखिला नहुँदा सञ्चय कोषबाट आउने चार महिनाको ब्याज समेत कटौती भएको शिक्षकहरुको भनाई छ।

निकासामा ढिलाई भएपछि गाउँपालिका मातहतका २ मावि, २ निमावि र ४ प्राथमिक गरी ८ विद्यालयका प्रधानाध्यापक, शिक्षक र कर्मचारीहरुले पछिल्लो चार महिनादेखि तलब पाउन सकेको छैनन्।