क्रोएसियाले हार्‍यो तर कोलिन्डाले जितिन्

काठमाडौं- विश्वकप फाइनलमा क्रोएसियाले हार्‍यो तर कोलिन्डाले संसारका खेलप्रेमीको मन जितेकी छिन्। विश्वकप जित्ने फ्रान्सको भन्दा यतिबेला कोलिन्डाको चर्चा मिडिया र सामाजिक संजालमा बढी भएको छ । खेलप्रतिको उनको प्रेम र खेलाडीलाई उनले दिएको प्रोत्साहन दुनियाँका लागि उदाहरण बनेको छ । सबै खेलप्रेमीले कोलिन्डाको खुलेर प्रशंसा गरेका छन् ।

कोलिन्डा ग्राबर किटारोभिक क्रोएसियाकी पहिलो महिला राष्ट्रपति हुन्। सन् २०१५ मा ४६ वर्षको उमेरमा उनी राष्ट्रपति चयन भएकी थिइन् । 

खासगरी, हालै सम्पन्न फिफा विश्वकपबाट उनी विश्वव्यापी चर्चामा छन् । आफ्नो देशका खेलाडीहरूलाई मातृवत् व्यवहारका कारण उनको चर्चा चुलिएको हो । कतिपय मिडियाले त उनलाई विश्वकपकी आमा भनेर सम्बोधन गरेका छन् । क्रोएसियाले फ्रान्सविरुद्ध विश्वकप फाइनल खेल्दै गर्दा उनी मैदानमै पुगेर खेलाडीको मनोबल बढाइरहेकी थिइन् । हरेक खेलमा खेलाडीलाई उनले दिएको माया र प्रोत्साहन साच्चिकै उदाहरणीय छ, त्यसको अहिले विश्वभर प्रशंसा भइरहेको छ । 

हारका बावजुद गोल्डेन बल पुरस्कार पाउन सफल क्रोएसियाका खेलाडी लुका मोड्रिकलाई भावुक बन्दै अँगालो हालेको राष्ट्रपति कोलिन्डाको तस्बिर भाइरल बनेको छ संसारभर । 



रुसको राजधानी शहर मस्कोस्थित लुजनिकी स्टेडियममा आइतबार भएको क्रोएसिया र फ्रान्सबीचको फाइनल खेल हेर्न आयोजक राष्ट्र रुसका राष्ट्रपति भ्लादिमिर पुटिन, फ्रान्सका राष्ट्रपति इमानुएल म्याक्रोनसँगै पुगेकी थिइन्, कोलिन्डा । 

उनी टिमको हौसला बढाउन आफ्नै राष्ट्रिय टोलीको रातो र सेतो बुट्टा भएको जर्सी लगाएर पुगेकी थिइन् । स्टेडियमको भीआईपी कक्षमा फ्रान्स र क्रोएसियाको गोलसँगै उनले खेलको मजा लिइन् । क्रोएसियाले गोल हान्दा आम समर्थकजस्तै उनी कुर्सीबाट उठेर चिच्याएर खुशी हुन्थिन् । आफ्नो राष्ट्रलाई उत्साह र उमंग दिँदै खेलमा डुबेकी थिइन् ।

विश्वकप, २०१८ को उपाधि फ्रान्सले उठाउन सफल भयो । त्यसबाट उनी निराश पक्कै भइन् । अवार्ड वितरणका लागि फिफा अध्यक्ष जियानी इन्फान्टिनो, रुसी राष्ट्रपति पुटिन, फ्रान्सका राष्ट्रपति म्याक्रोन र कोलिन्डा सँगै मैदानमा पुगे । आदर्श र सद्भावका साथ म्याक्रोनको हात समातेर उनी मैदानमा देखापरेकी थिइन् ।

टिमले हारेपछि निराश बनेका लुका मोड्रिक गोल्डेन बल अवार्ड लिन अगाडि बढे । उनको अनुहारमा गोल्डेन बल अवार्ड लिनुभन्दा धेरै हारको पीडा थियो । पानी परिरहेको थियो, मानौं क्रोएसियाको हारमा रोइरहेको थियो आकाश । 


राष्ट्रपति कोलिन्डाले लुकालाई धेरै समयसम्म अँगालो हालिन्, गाला थम्थपाइन् र पीडा कम गर्न मद्दत गरिन् । सबै खेलाडीलाई उनले त्यसरी नै हौसला र सान्त्वना दिइन् । विजेता राष्ट्र फ्रान्सलाई पनि त्यसरी नै बधाइ र सफलताको शुभकामना व्यक्त गरेकी थिइन् । जित हात पार्न सफल नहुनुको पीडा त थियो नै, फाइनलमा पुग्न र इतिहास रच्न सफल हुनुको खुशी पनि उनको अनुहारमा झल्किन्थ्यो । 

मस्कोको लुजनिकी स्टेडियममा दमदार उपस्थितिपछि राष्ट्रपति कोलिन्डाका बिकिनी तस्बिरहरू पनि सामाजिक सञ्जालमा भाइरल बनेका छन् । खैरो कपाल, गोरो अनुहार, हल्का मोटी तर सलक्क परेको ज्यान र मृगनयनी अनुहारमा उनी ५० वर्षमा पनि कुनै सुन्दरीभन्दा कम छैनन् । 

केही समयअघि आफ्ना श्रीमान्सँग समुद्री तटमा बिकिनी ड्रेसमा रोमान्स गरिरहेका उनका तस्बिरले तरंग ल्याएका थिए । घरको भित्तामा रोगन लगाउँदै गरेका तस्बिरका कारण पनि उनी चर्चामा आएकी थिइन्।


तस्बिर स्रोत: फिफा