काठमाडाैं- रसियामा भएको २१ औं संस्करणकाे फिफा विश्वकप फुटबल प्रतियोगिता निकै रोचक र अनपेक्षित बन्यो । उपाधि दाबेदार मानिएका ब्राजिल, अर्जेन्टिना, जर्मनी, स्पेनजस्ता देशहरु क्वाटर फाइनल भन्दामाथि जान नसकेपछि विश्वकप झनै रोचक बनेको थियो ।
यसपटक इङ्ल्याण्ड, बेल्जियम, क्रोएशिया, फ्रान्सजस्ता कम ध्यान दिइएका देशहरुले निकै राम्रो प्रदर्शन गरे । यी चार टोली सेमिफाइनलमा पुगेका थिए । अन्ततः पहिलो पटक फाइनलमा पुगेको क्रोएशियालाई ४-२ ले हराएर फ्रान्सले दोस्रो पटक उपाधी जित्यो ।
३२ देश सहभागी भएको विश्वकपमा फाइनल खेलसम्म आइपुग्दा ६४ खेल भए । जसमा ७३६ जना खेलाडी सहभागी भए भने १६९ वटा गोल भयो । जसमध्ये १२ वटा त आत्मघाती नै गोल भएको छ । फाइनल खेलमा पनि क्रोएशियाका खेलाडी मारियो मान्जुकिचले खेलको १८ औं मिनेतमा आफ्नै पोस्टमा गोल गरेर फ्रान्सलाई सुरुवाती अग्रता दिएका थिए ।
२१ औं संस्करणको यस विश्वकपमा २२ वटा पेनाल्टी दिइएको थियो । जुन अहिलेसम्मकै विश्वकपको इतिहासमा सबैभन्दा बढी हो । २२ मध्ये ७ वटा पेनाल्टी मिस भएका छन् भने बाँकी गोलमा परिणत भएका थिए । यस विश्वकपमा सर्वाधिक गोल गर्ने खेलाडी भने इङ्ल्याण्डका हेरी केन भए । उनले खेल अवधिभरमा ६ वटा गोल गरेका थिए । सबैभन्दा बढि गोल गर्ने देश बेल्जियम बनेको छ । उसले यस विश्वकपमा १६ गोल गरेर रेकर्ड राखेको हो । सबैभन्दा धेरै गोल खाने देश भने पानामा बन्यो । जसले खेलअवधिमा ११ गोल खायो ।
रसिया विश्वकपमा २१९ वटा पहेँलो कार्ड प्रयोग भयो भने ४ बटा रातो कार्ड दिइयो । सबैभन्दा पहिला रातो कार्ड पाउने अभागि खेलाडी कार्लोस सान्चेज भए । धेरै पहेँलो कार्ड खाने देश भने क्रोएशिया बन्यो । जो यस विश्वकपको उपविजेता बन्यो ।
यस विश्वकपको एउटै खेल नजित्ने ६ वटा देश अभागि सावित भए । अस्ट्रेलिया, कोस्टारिका, इजिप्ट, आइसल्यान्ड, मोरक्को र पानामाले विश्वकपमा एक खेल पनि जित्न सकेनन् । क्रोएशिया, बेल्जियम र उरुग्वेले भने समुहचरण सबै खेलमा जित हात पारेका थिए ।
२१ औं संस्करणको विश्वकपमा सबैभन्दा जेठा खेलाडी इजिप्टका इसाम एल हादारी थिए । जो ४५ वर्षका थिए । सबैभन्दा कान्छा खेलाडी भने अस्ट्रेलियाका १९ वर्षीय ड्यानियल अर्जानी थिए । सबैभन्दा कम उमेरम गोल गर्ने खेलाडीको लिस्टमा भने फ्रान्सका १९ वर्षीय खेलाडी केलियन एमबाप्पे रहे । उनले यस विश्वकपमा ४ गोल गरेका छन् ।
प्रकाशित: Dec 31, 2017| 18:23 आइतबार, पुस १६, २०७४