'विश्वकपको खुशी'सँगै रक्सीको खोलो

काठमाडौं- मानव उप्रेती अर्जेन्टिनाको ठूला फ्यान हुन् । फ्रान्ससँग अर्जेन्टिनाको खेलमा उनी रौसिएर बियरको बोतल अगाडि राखेर बसेका थिए । जब अर्जेन्टिनामाथि फ्रान्स हाबी भयो, बियरको चुस्की निल्न सकेनन् । 

मैदानमा दौडिरहेका अर्जेन्टिनी खेलाडीलाई पनि उप्रेतीलाई जस्तो तनाव भएन होला । वरिपरि बसेका साथीहरू फ्रान्सका समर्थक थिए । अर्जेन्टिनाको पोस्टतिर बल लैजान फ्रान्सेली खेलाडीहरूलाई भनिरहेका थिए । मानौं, टीभीबाटै उनीहरूको आवाज मैदानसम्म पुगिरहेको छ । र, उप्रेतीलाई गिज्याइरहेका पनि थिए । 

खेलको अन्त्यसम्म उनले आशा मारेका थिएनन् । विस्तारै बियरको चुस्की लिइरहेका उनले अन्तिममा भने एकै पटकमा 'घ्याम्पे' गरिदिए । किनभने, अर्जेन्टिनाले हार्‍यो, साथीहरूको टिम फ्रान्सले जित्यो । 'खेलको मजा लिँदै बियर पिउँला भन्ने सोच थियो,' उनी भन्छन्, 'एक सटमै बियर बुत्याएर सुतिदिएँ ।' 

तनावको साथी मदिरा । खुशी साटासाट गर्ने माध्यम पनि मदिरा । त्यसदिन उप्रेतीका लागि बियर तनावको साथी बन्यो । 
 

अर्जेन्टिना, ब्राजिलजस्ता विश्वकपका सदावहार दाबेदार टोली बाहिरिएपछि मदिराका ग्राहक २५ प्रतिशतले घटे । नेपाली दर्शकको ठूलो संख्या तिनै टोलीको समर्थक थियो । 

अर्का युवा निरज श्रेष्ठ ब्राजिलका समर्थक । प्रि-क्वार्टरफाइनलमा उनी निकै दंगदास थिए । किनभने, उनको टिम क्वार्टरफाइलमा छनोट भयो । ब्राजिलका खेलाडीले जति मेक्सिकोको गोलपोस्टतिर बल हुर्‍याउँथे, उद्वेलित हुँदै बियरको चुस्की स्वाट्टै पार्थे । मानौं, ब्राजिलका खेलाडीको खुट्टामा नाचिरहेको बलले उनलाई बियर पिउने अनुमति दिइरहेको होस् । साथीहरू माझ गितार बजाए, गीत गाए अनि बियरको चुस्कीमा रमाए । 


माइतीघरको 'दी हट' रेस्टुराँमा फ्रान्स भर्सेस बेल्जियम भिडिरहेको टीभीमा हेर्दै  थिए, ग्राहकहरू । रेस्टुराँका सञ्चालक सुनील थापा भने उनीहरूको 'एक्साइटमेन्ट' देखेर रमाइरहेका थिए । कोही फ्रान्स त कोही बेल्जियमका पक्षमा 'हुटिङ' गर्दै थिए । 

थापाका अनुसार अर्जेन्टिना र ब्राजिललाई फ्रान्स र बेल्जियमले 'राउन्ड सिक्स्टिन' र प्रिक्वार्टरफाइनलमा हराएको पल त वर्णन गरिनसक्नु थियो । अर्जेन्टिना र ब्राजिलले हार्दा ती मुलुकका समर्थक नेपाली दर्शक विश्वकप नै सकिएझैं गरी निराश देखिन्थे । जति-जति ब्राजिल र अर्जेन्टिना हार्दै गरेको आभास मिल्थ्यो, ती टिमका समर्थकहरू 'दुःख भुलाउन' बियरको चुस्की बढाउँथे ।



साइनो विश्वकप र मदिरा

आफ्नो टिमले गोल खाँदा बियर, गोल हान्दा पनि बियर, खेल जितेपछि खुशीमा थपिने 'एक्स्ट्रा' बोतल । रेस्टुराँ सञ्चालकहरूले दर्शकको मनोदशा राम्रैसँग पढ्न पाए, विश्वकपमा । मानौं, त्यो विश्वकपको अवसर नभई 'बियर अकेजन' थियो । 'इमोनस'सँग बियर जोडिएको प्रष्ट देखिन्थ्यो । 

जानकारहरू भन्छन्, लभ परेकालाई बियरले 'रोमान्स' जगाउँछ । 'ब्रेक अप' भएको पीडा र रोदन पनि बियरले नै भुलाउँछ । त्यसै पनि मदिरालाई खुशी, दुःख साटासाट गर्ने माध्यम बनाइँदै आएको छ, परापूर्वकालदेखि नै । 

ललितपुर कुमारीपाटीको 'एला लन्ज'का 'मार्केटिङ डाइरेक्टर' निरेश शाहीका अनुसार वर्ल्डकप फिभरसँगै मध्यपान सेवन पनि ५० प्रतिशतले बढ्यो । नयाँबानेश्वरको अमिगो रेस्टुराँका सञ्चालक विनोद पन्त भन्छन्, 'विश्वकपका कारण एक महिना हाम्रो व्यापार फुल फ्लेजमा चल्यो ।'
 

विश्वकपमा 'सोसल मिडिया ग्यादेरिङ' राम्रै देखियो । सबै उमेर समूहको व्यापक उपस्थितिबाट लाग्थ्यो, विश्वकपले साँच्चै नै विश्वलाई समेट्यो । 

त्यसबीचमा बार र रेस्टुराँहरूले 'लाइभ म्युजिक'को जोरजाम गर्नुपरेन, फुटबलले नै त्यसको धीत मारिदियो । विश्वकप अगाडिसम्म 'फुल फ्लेज'को व्यापारका लागि सप्ताहन्त पर्खिनुपथ्र्यो । विश्वकपका एक महिना भने सप्ताहन्तको प्रतीक्षा नै भएन । 

बिजुलीबजारका मोक्ष लन्ज एन्ड बारका लागि विश्वकप 'लक्की चार्म' बन्यो । तर, शुरूवाती चरण जति उत्साहप्रद रह्यो, पछिल्ला दिनमा भने २५ प्रतिशत ग्राहक घटे । अर्थात्, अर्जेन्टिना, ब्राजिलजस्ता विश्वकपका सदावहार दाबेदार टोली बाहिरिए । नेपाली दर्शकको ठूलो संख्या तिनै टोलीको समर्थक थियो । 



'दी हट' का सञ्चालक थापाका अनुसार विश्वकपमा ३५ देखि ४० प्रतिशतले व्यापार बढ्यो । 'यस कारण पनि विश्वकपले ज्यान थपेको छ,' उनी भन्छन् ।

पुरानो बानेश्वरस्थित वन्डरल्यान्डका सञ्चालक सन्तोष श्रेष्ठका अनुसार विश्वकपभरि ३० देखि ४० प्रतिशतले व्यापार बढ्यो । '४० हजारको व्यापारमा खानाको १० हजार र मदिराको ३० हजारको व्यापार भयो,' उनी भन्छन्, 'वर्ल्डकपले राम्रो टर्नओभर दिएको छ ।' मोक्षमा पनि बियर र खानाको ७०ः३० को अनुपात रह्यो । 

लेट नाइटको व्यापार, ग्राहकको घुइँचो

स्र्पोटस बारदेखि क्लब र सामान्य रेस्टुराँसम्मले विश्वकपको मजा चखाए, ग्राहकहरूलाई । लेट नाइट व्यापार, ग्राहकको घुइँचो, विभिन्न देशका जर्सीले भरिएको रेस्टुराँको हल, टेबलमा ठड्याइएका बियरका बोतल र ठूलो टीभी स्क्रिनमा एकोहोरिएका आँखाहरू । विश्वकपको माहोल यस्तै रह्यो, यसपटक । 

मेला रेस्टुराँ एन्ड बारले भने अबेरको व्यापारलाई प्राथमिकता दिएन । सञ्चालक प्रमोदकुमार जयसवालका अनुसार 'फ्यामिली फोकस्ड' भएकाले अबेरको व्यापारलाई वास्ता नगरिएको हो । 

झम्सिखेलस्थित स्पोटर्स हाइभ लाइभ त्यस क्षेत्रमा चलेको स्पोर्ट्स बार हो । फर्मुला वान, आईपीएल र लिग खेलहरू लाइभ देखाइन्छ, त्यहाँ । विश्वकप त छुटाउने कुरै भएन । 



लाजिम्पाटस्थित टाइगर स्पोट्र्स क्लबमा पनि विश्वकपभर भीडभाड राम्रै रह्यो । क्लबका सञ्चालकका अनुसार नेपाली दर्शकमा यसपटक विश्वकपको क्रेज राम्रै देखियो । 

रेस्टुराँ सञ्चालकहरूका अनुसार महिला र पुरुषको तुलना नै गर्न सकिएन । किनभने, १० जना पुरुष आउँदा एक मात्र महिलाको अनुपात रह्यो । महिलाहरू 'लेट नाइट'को रौनकमा नरमाउने गरेको पाइयो, यसपटक । 

जस्तो : मोक्षले महिलाका लागि धुवाँ र होहल्लाबाट टाढा राख्न अलग्गै हलको व्यवस्था गरेको थियो । र, उनीहरूका लागि व्यवस्था गरिएको हलमा पारिवारिक वातावरण दिने प्रयास गरेको थियो । त्यसैले उक्त रेस्टुराँमा महिला र पुरुषको अनुपात २ :१ थियो । 

अप्रत्यासित नतिजा

यस पटकको खेलमा नेपालमा गणतन्त्र आएझैं भयो । लामो समयदेखि एक्लौटी विजेताझैं देखिएका अर्जेन्टिना, ब्राजिल, जर्मनीजस्ता देश कोही नकआउट त कोही प्रि-क्वार्टरफाइनलबाटै बिदा भए । 

अर्जेन्टिनाको खेलमा प्रायः मान्छे खचाखच हुन्थे, थाम्नै नसक्ने गरी । मोक्षमा म्यानेजिङ डाइरेक्टर मिलन थापाका अनुसार ती मुलुक बाहिरिएपछि मानिस कम भए । अन्तिमसम्म ती मुलुक टिक्न सकेका भए व्यापारको रौनक पनि उस्तै रहने व्यवसायीहरूको अनुमान छ । 

दी हटका सञ्चालक थापाका अनुसार विश्वकपको अप्रत्यासित नतिजाले व्यापार घटेको छ । नेपालमा बहुसंख्यक फ्यान अर्जेन्टिना, ब्राजिल, स्पेन र जर्मनीका देखिए । 



बहाना विश्वकप, व्यापार मदिराको

वन्डरल्यान्डका म्यानेजर श्रेष्ठका अनुसार विश्वकपसँगै पेय पदार्थको खपत पनि अत्यधिक भयो । ठूला व्यवसायीदेखि स-साना लिकर सपमा पनि त्यसको प्रभाव देखिएको छ । 

सीजी ब्रुअरीका प्रबन्ध निर्देशक कुमार श्रेष्ठका अनुसार साविक दिनभन्दा विश्वकपको रौनकमा २५ देखि ३० प्रतिशतले व्यापार बढ्यो । ग्वार्कोस्थित 'दी सानेपा मदिरा'का सञ्चालक अरुण सिग्देलका अनुसार टुबोर्ग बियरको खपत अरूको तुलनामा बढी देखियो । 

'लुज लिकर'का अनुसार हालमा 'हार्ड लिकर'को प्रयोग पनि राम्रै देखियो । साविकभन्दा मदिराको व्यापार दोब्बर भएको उक्त मदिरा पसलका सञ्चालकको भनाइ छ । बियरमा टुबोर्ग, काल्सबर्ग र गोरखाको व्यापार बढी भयो । 

फाइनल खेलका लागि अधिकांश रेस्टुराँ 'बुक' भइसकेका छन् । तीमध्येका केहीले ग्राहक भित्र्याउन विभिन्न अफर पनि दिएका छन् । 

दी हटमा यसअघि नै ७० जनाको बुकिङ भइसकेको छ । उक्त रेस्टुराँले बियरमा 'बाई थ्री गेट वान' अफर दिएको छ । मोक्षमा पनि सिभिल हस्पिटलबाट सय जनाको एड्भान्स बुकिङ भइसकेको छ । 

खेललाई मैत्रीभाव जगाउने र कूटनीतिक सम्बन्ध विस्तार गर्ने माध्यम मानिन्छ । यसपटकको विश्वकप आयोजक रुसका राष्ट्रपति भ्लादिमिर पुटिनले यसबाट आफ्नो मुलुकलाई हेर्ने विश्वव्यापी दृष्टिकोण बदलिने अपेक्षा गरेका छन् । 

यस पटकको विश्वकपमा 'सोसल मिडिया ग्यादेरिङ' राम्रै देखियो । सबै उमेर समूहको व्यापक उपस्थितिबाट लाग्थ्यो, विश्वकपले साँच्चै नै विश्वलाई समेट्यो ।