कान्तिपुरको प्रधानसम्पादकमा नारायण वाग्ले

काठमाडौं- कान्तिपुर दैनिकको प्रधानसम्पादकमा पुनः नारायण वाग्ले नियुक्त भएका छन् । 

प्रधानसम्पादक सुधीर शर्माले राजिनामा दिएपछि कान्तिपुरले वाग्लेलाई पुनः प्रधानसम्पादकमा नियुक्त गरेको हो । 

तनहुँमा जन्मिएका वाग्ले यसअघि पनि कान्तिपुर दैनिक सात वर्ष सम्पादक भएर काम गरिसकेका छन् । पत्रकारितामै तीन दशकभन्दा बढी बिताएका वाग्लेले नागरिक दैनिकमा प्रधानसम्पादक भएर काम गरिसकेका छन् । 

पत्रकारितासँगै लेखनमा सक्रिय वाग्लेको पल्पसा क्याफे उपन्यासले ०६१ सालमा मदन पुरस्कार प्राप्त गरेको थियो । नेपालको आख्यान इतिहासमा सबैभन्दा बढी बिक्री भएको उपन्यासका रूपमा 'पल्पसा क्याफे' परिचित छ। उनले पछिल्लो समय लेखेको उपन्यास मयूर टाइम्स हो । 

नेपथ्यको लोकप्रिय गीत 'भेडाको उनजस्तो... ' का शब्द पनि वाग्लेकै हुन्।