अतिक्रमणले भक्तपुर डुब्यो, चिकित्सक हड्तालमा 

काठमाडौं- राजधानीबाट प्रकाशित शुक्रबारका अधिकांश राष्ट्रिय दैनिक पत्रिकाहरुले भक्तपुरमा बाढीले मच्चाएको वितण्डालाई मुख्य प्राथमिकतामा पारेका छन् । 

अविरल वर्षासंगै आएको बाढीले भक्तपुरका अधिकांश भुभाग डुबानमा परेको छ । सयौँ घर, अस्पताल र विद्यालयको तल्लो तला जलमग्न भएको थियो भने पहिरोले पुरिएर भक्तपुरमा एकै परिवारका ३ जनाको मृत्यु भएको छ  । 

यसै विषयलाई मुख्य समाचार बनाउँदै आजको कान्तिपुर दैनिकले 'नदी अतिक्रमणले डुब्यो भक्तपुर' शीर्षकमा मुख्य समाचार छापेको छ । अतिक्रमणका कारण नदि साघुरिएकाले अविरल वर्षापछि आएको बाढीले निकास पाउन नसक्दा भक्तपुर जलमग्न भएको छ । बुधबार रातीदेखिको वर्षाले हनुमन्ते नदीमा बाढी आएपछि सूर्यविनायक, मध्यपुर थिमि र भक्तपुर नगरपालिकाका अधिकांश स्थान डुवानमा परेको समाचारमा उल्लेख छ ।

आजको नयाँ पत्रिकाले 'बस्ती खोलामा बस्यो, खोला सहर पस्यो' शीर्षकमा मुख्य समाचर छापेको छ । राज्यको नीति अभावले खोलामा समेत बस्ती विकास हुँदा बस्ती नै डुवानमा परेको नयाँ पत्रिकाले लेखेको छ । नदीमाथिको अपराधका कारण नै बाढी बस्तीमा पसेको पनि उसले उल्लेख गरेको छ  यस्तै आजको नागरिक दैनिक र अन्नपूर्ण पोस्टले पनि बाढीको वितण्डालाई मुख्य समाचार बनाएका छन् । 

यसैगरि आजका अखबारहरुले अनशनरत डा गोविन्द केसीको मागप्रति सरकार संवेदनशील नभएको भन्दै चिकित्सकहरुले आजदेखि आकस्मिक बाहेकका सेवा ठप्प पार्ने घोषणा गरेको विषयलाई पनि विशेष प्राथमिकताका साथ छापेका छन् । त्रिवि शिक्षण अस्पतालमा कार्यरत आवासीय चिकित्सकको संस्था नेसनल रेजिडेन्ट डक्टर्स एसोसिएसनले शुक्रबारदेखि आकस्मिक बाहेकको सेवा ठप्प पार्ने घोषणा गरेको हो ।

यसैविषयलाई मुख्य समाचार बनाउँदै आजको नागरिक दैनिकले 'चिकित्सक हडतालमा : शुक्रबारदेखि आकस्मिकबाहेकका सेवा बन्द' शीर्षकमा खबर लेखेको छ भने डा गोविन्द केसीको स्वास्थ्य अवस्था जटिल बन्दै गएको पनि उल्लेख गरेको छ । 

यस्तै गृहमन्त्री रामबहादुर थापाका राजनीतिक सल्लाहकार सूर्य सुवेदीले मन्त्रालयमै डाकेर चिकित्सकलाई केरकार गरेको विषयलाई कान्तिपुरले महत्वका साथ छापेको छ । उसका अनुसार ट्रमा सेन्टरमा कार्यरत डा. भोजराज अधिकारीलाई अपहरणको शैलीमा लगेर दुव्र्यवहार गरेको समाचारमा उल्लेख छ ।