काठमाडौं- राजधानीबाट प्रकाशित बिहीबारका राष्ट्रिय दैनिक अखबारहरुले डा. गोविन्द केसीको अनसन, प्रधानमन्त्रीको निर्देशन र मौद्रिक नीति सार्वजनिक भएको विषयलाई मुख्य समाचार बनाएका छन् ।
डा गोविन्द केसीको जारी अनशनका विषयमा 'हठ त्यागौं, वार्तामा बसौं' शीर्षकको विचारलाई मुख्य प्राथमिकताका साथ छापेको आजको अन्नपूर्ण पोस्टले उपत्यकामा दिउँसो टिपर चलाउन निषेध गरिएको र मन्त्रीलाई बोलाएर प्रधानमन्त्रीले सिन्डिकेट अन्त्य गर्न निर्देशन दिएको विषयलाई एङ्कर न्युज बनाएको छ ।
प्रधानमन्त्री केपी शर्मा ओलीले भौतिक पूर्वाधार तथा यातायातमन्त्री रघुवीर महासेठ र मन्त्रालयका सचिव मधुसूदन अधिकारीलाई सार्वजनिक यातायातमा सिन्डिकेट पूर्णरुपमा अन्त्य गर्न निर्देशन दिएको समाचारमा जनाइएको छ । प्रधानमन्त्री ओलीले सिन्डिकेट अन्त्य गर्न चालिएका कदम प्रभावकारी हुन नसकेकोमा असन्तुष्टि जनाउँदै त्यस्ता कदम फितलो नबनाउनसमेत मन्त्री महासेठ र सचिव अधिकारीलाई सचेत गराएको अन्नपूर्णले लेखेको छ ।
डा केसीको स्वास्थ्य अवस्था गम्भिर बन्दै गएको विषयलाई मुख्य समचार बनाएको नागरिक दैनिकले भने उनी बोल्न नसक्ने अवस्थामा पुगेको जनाएको छ । यस्तै उसले कलंकी-नागढुंगा/चाबहिल-जोरपाटी सडक तत्काल बनाउन प्रधानमन्त्रीले निर्देशन दिएको विषयलाई पनि विशेष प्राथमिकताका साथ छापेको छ ।
सरकारले बिहीबार फेरि संसद्मा चिकित्सा शिक्षा विधेयक पेस गर्न लागेको विषयलाई मुख्य समाचार बनाएको आजको कान्तिपुर दैनिकले बुधबार सार्जजनिक भएको मौद्रिक नितीले ब्याजदर घटाउने संकेत गरेको विषयलाई पनि प्राथमिकतामा पारेको छ ।
समाचारमा जनाइएअनुसार डेढ वर्षयता लगातार रुपमा बढिरहेको व्याजदर केहि घट्ने संकेत देखिएको छ । मौद्रिक नीतिमार्फत राष्ट्र बैंकले बजारमा तरलता बढाउन विभिन्न कार्यनीति सार्वजनिक गरेपछि ब्याजदर घट्ने अपेक्षा गरिएको कान्तिपुरले लेखेको छ ।
डा केसी आउन नमानेपछि जुम्ला जान लागेको हेलिकोप्टर रोकिएको विषयलाई एङ्कर न्युज बनाएको नयाँ पत्रिकाले मौद्रिक नीति सार्वजनिक भएको विषयलाई मुख्य समाचार बनाएको छ । उसले 'नगद प्रवाह बढ्दै, ब्याजदर घट्दै' शीर्षकमा खबर लेखेको छ ।
यस्तै ५० करोडको खानेपानी आयोजनामा २५ करोड अनियमितता भएको समेत आजको नयाँ पत्रिकाले खुलासा गरेको छ । बुटबल र राप्ती खानेपानी आयोजनाका लागि पाइप खरिद गर्दा नेपाल खानेपानी संस्थानबाटै यति ठूलो रकम अनियमितता भएको समाचारमा उल्लेख छ ।
प्रकाशित: Dec 31, 2017| 18:23 आइतबार, पुस १६, २०७४