डा केसीले भने- 'वार्तामा बस्न तयार छु'

काठमाडौं- १२ दिनदेखि अनशनरत डा. गोविन्द केसीले आफू वार्ताका लागि तयार रहेको बताएका छन् । डा. केसी वार्तामा बस्न तयार नरहेको सरकारी भनाईको बाहिर आइरहेका बेला डा केसीले त्यसको खण्डन गर्दै आफू वार्ताका लागि तयार रहेको बताएका हुन् । 

बुधबार एक विज्ञप्ती जारी गर्दै उनले सरकारले बोलाएको खण्डमा वार्ता टोली पठाउन आफू तम्तयार रहेको जनाएका छन् । उनले सरकार संवेदनहीन र गैर जिम्मेवार बन्दै गइरहेको समेत आरोप लगाएका छन् । दलीय वा अन्य स्वार्थ वा पूर्वाग्रह छाडेर तीन करोड नेपालीको हित सुनिश्चित हुने गरी सोच्न पनि उनले सरकारलाई सुझाएका छन् ।

चिकित्सा शिक्षा ऐन तथा कर्णाली स्वास्थ्य विज्ञान प्रतिष्ठानमा एमबीबीएस कार्यक्रम शुरु हुनुपर्ने लगायत माग राखेर जुम्लामा १२ दिनदेखि अनशन बसिरहेका डा केसीको स्वास्थ्य अवस्था विग्रिदै गएको छ । 

रगतमा म्याग्नेसियमको मात्रा घट्दै गएको, मुटुको चाल तलमाथि भइरहेको, छातीको बीच भागमा दुखाइ, कमजोरी, चक्कर लाग्ने, रगतमा चिनीको मात्रा घट्दै गएको उपचारमा संलग्न चिकित्सकले जानकारी दिएका छन् । उनको स्वास्थ्य अवस्था गम्भीर बनेपछि स्पेशल केयर युनिटमा राखेर मनिटरिङ भइरहेको छ ।