चितवन- पहिरो खसेपछि अवरुद्ध भएको नारायणगढ–मुग्लिन सडक ६ घण्टा पछि खुलेको छ ।
बिहान पाँच बजे खसेको पहिरो स्काभेटरले ६ घण्टा लगाएर पन्छाएपछि बिहान ११ बजेबाट खुलेको हो । सडक दुईतर्फी रुपमा नै सञ्चालमनमा आएको जिल्ला प्रहरी कार्यालयले चितवनले जनाएको छ ।
पहिरो पन्छाएर सडक खुलाएपछि अहिले सवारीसाधन तथा यात्रु आ(आफ्नो गन्तव्यतर्फ लागेका छन् । भरतपुर महानगरपालिका–२९, घुमाउने, टोपे खोला र जलवीरेमा गरि ३ ठाउँमा पहिरो खसेको थियो । पहिरोका कारण बाटो अवरुद्ध हुँदा सयौँ सवारी साधन र हजारौँ यात्रु बिचबाटोमा नै अलपत्र परेका थिए ।
विगत दुई दिनदेखि लगातार पानी परिरहेकाले नारायणगढ–मुग्लिन सडक खण्डमा पहिरोको जोखिम बढेको छ । सडकका जुनसुकै ठाउँमा पहिरो खस्न सक्ने भन्दै प्रहरीले उच्च सतर्कता अपनाउन यात्रु र चालकलाई आग्रह गरेको छ । असार महिना लागेदेखि हरेक दिनजसो मुग्लिन सडक बन्द हुँदै आएको छ ।
सडक विस्तार गरेर स्तरोन्नति गरिए पनि यो सडक खण्डमा पहिरो जानेक्रम भने रोकिएको छैन । सरकारले उच्च जोखिमको सडक भित्र यस सडकखण्डलाई पनि समावेश गरेको छ ।
प्रकाशित: Dec 31, 2017| 18:23 आइतबार, पुस १६, २०७४