काठमाडौं- राजधानीबाट प्रकाशित बुधबारका राष्ट्रिय दैनिक पत्रिकाहरुले विविध विषयलाई पहिलो प्राथमिकतामा पारेका छन् ।
केहिले अनसनरत डा गोविन्द केसीको उपचारमा प्रशासन बाधक बनेको विषयलाई प्राथमिकतामा पारेका छन् भने केहिले सिंहदरबारमै असारे विकास भएको प्रसंगलाई मुख्य समाचार बनाएका छन् ।
नारायणगढ–मुग्लिन सडक भौगर्भिक अध्ययनै नगरी स्तरोन्नति गरेको आजका कान्तिपुर दैनिकले खुलासा गरेको छ । प्रकाशित समाचार अनुसार स्तरोन्नतिका क्रममा विस्तृत भौगर्भिक अध्यया नगराइँदा नारायणगढ–मुग्लिन सडकमा पहिरो खस्नेक्रम बढेको भूगर्भविद्हरुले बताएका छन् । तीन वर्षअघि सडक स्तरोन्नति सुरु भएसंगै पहिरोको जोखिम बढेको हो । यसलाई ठूलो हेलचेक्राइँका रुपमा लिइएको छ ।
कान्तिपुरले कर्णाली राजमार्ग अवरुद्ध हुँदा तीन दिनदेखि यात्रु बाटोमै अलपत्र परेको र संसद्ले दाताको सहयोग नलिने घोषणा गरेको विषयलाई पनि प्राथमिकताका साथ पहिलो पृष्ठमा छापेको छ ।
आजको नयाँ पत्रिकाले जुम्लामा अनसनरत डा. गोविन्द केसीको उपचारमा प्रशासनले असहयोग गरेको र सिंहदरबारमै असारे विकास भइरहेको विषयलाई मुख्य प्राथमिकतामा पारेको छ । उसले आँगनमा विकास गर्न असार पर्खने सिंहदरबारले दूरदराजको उन्नति कहिले गर्ने भनेर पनि प्रश्न गरेको छ ।
बालुवा खानीमा नेताकै लगानी लगेको विषयलाई खुलासा गरेको आजको अन्नपूर्ण पोस्टले चिकित्सा शिक्षासम्बन्धी राष्ट्रिय नीति तर्जुमा गर्ने विषयमा शिक्षामन्त्री गिरिराजमणी पोखरेलकै भूमिका शंकास्पद् बनेको खबर छापेको छ । उसले नेपाललाई जलमार्गबाट जोड्ने भनि भारतसंग भएको सम्झौता कार्यान्व्यनको चरणमा रहेको विषयलाई पनि पहिलो पृष्ठमा छापेको छ ।
नागरिक दैनिकले भने प्रदेश २ को प्रहरी ऐनमा नेपाल प्रहरीले आपत्ति जनाएको र डा. गोविन्द केसीको उपचारमा प्रशासन बाधक बनेको विषलाई मुख्य प्राथमिकतामा पारेको छ । समाचार अनुसार डा गोविन्द केसीको उपचारका लागि प्रशासनले अवरोध गरेपछि कर्णाली स्वास्थ्य विज्ञान प्रतिष्ठान शिक्षण अस्पतालबाट अनसनस्थल पुगेको मेडिकल टोली फिर्ता भएको छ ।
प्रकाशित: Dec 31, 2017| 18:23 आइतबार, पुस १६, २०७४