सर्पको डसाईबाट चारको मृत्यु

महोत्तरी-सर्पदंशबाट महोत्तरीमा एकैदिन चारजनाको ज्यान गएको छ । महोत्तरीको बर्दिवास र गौशालामा विषालु सर्पको डसाईबाट चारजनाको ज्यान गएको हो । 

बर्दिवास नगरपालिकामा दुई र गौशाला नगरपालिकामा दुई जनाको मृत्यु भएको प्रहरीले जनाएको छ ।

सर्पको डसाईबाट बर्दिवास-५ का २७ वर्षका बलबहादुर तामाङ, बर्दिबास ६ का ७३ वर्षका तिलकमाया राउत, गौशाला नगरपालिका-१२ का ३६ वर्षका सुशीलकुमार सिंह र ११ वर्षका मनिष राउतको मृत्यु भएको हो । 

तामाङको बर्दिवासस्थित सर्पदंश उपचार केन्द्रमा उपचार गर्न नसकिएपछि थप उपचार गर्न बाहिर लैजाने क्रममा ज्यान गएको प्रहरीले जनाएको छ । 

त्यसैगरी गौशाला नगरपालिकाका सिंह र राउतलाई उपचारको लागि ल्याउँदै गर्दा बाटोमा मृत्यु भएको सर्पदंश उपचार केन्द्रले जनाएको छ । वर्षा मौसम शुरु भए सँगै तराई क्षेत्रमा सर्पको बिगबिगि बढेको छ ।