चितवन- पहिरोका कारण नारायणगढ मुग्लिन सडकखण्ड फेरि बन्द भएको छ । सडकखण्डको चारकिलो, जलविरे र टोपेखोला लगायतका स्थानमा ठूलो पहिरो खसेपछि बाटो बन्द भएको हो ।
आइतबार रातीदेखिनै अबरुद्ध सडक बिहान ५ः१० बजेदेखि एकतर्फी रुपमा सञ्चालनमा आएकोमा बिहान ८ बजे पुनः सोहि ठाउँमा ठुलो चट्टान खसेपछि बाटो पूर्णरुपमा ठप्प भएको ट्राफिक प्रहरीले जनाएको छ ।
जिल्ला प्रहरी कार्यालय चितवनले दिएको जानकारीअनुसार बिहान ती स्थानमा ठुलो पहिरो गएकाले बाटो अवरुद्ध भएको हो । पहिरो पन्छाउन थालिएको भए पनि पानी परिरहेकाले पन्छाउन कठिन भएको नारायणगढ मुग्लिन सडक आयोजनाले जनाएको छ ।
बन्दका कारण सयौं सवारीसाधन र हजारौं यात्रु अलपत्र परेका छन् । असार लागेसंगै हरेक दिनजसो जाने पहिरोका कारण मुग्लिन सडक बन्द हुँदै आएको छ ।
सरकारले उच्च जोखिममा रहेका भनिएको सडकखण्डमध्ये यो एउटा सडकखण्ड हो । सडक विस्तारका क्रममा रहेकाले यो सडकखण्डको भुई कालोपत्रे भएको भए पनि समय समयमा खस्ने पहिरोका कारण सडक जोखिम पूर्ण रहेको छ ।