काठमाडौं–ग्राण्डी इन्टरनेसनल हस्पिटलमा दुर्घटनाग्रस्त रहेको सिम्रिक एयरको हेलिकोप्टरबारे छानबिन गर्न प्राविधिकसहितको अध्ययन टोली गठन गरिएको छ ।
शनिबार बिरामी लिन चितवन जाने तयारीमा रहेको अस्पतालको छतमा हेलिकोप्टर दुर्घटनामा परेको थियो ।
अध्ययन टोलीले दुर्घटनाको कारण पत्ता लगाई अस्पतालको छतबाट हेलिकोप्टर निकाल्नका लागि काम गर्ने सिम्रिक एयरका महाप्रवन्धक प्रेम थापाले नेपाल समयलाई जानकारी दिए । थापाले भने, ‘हेलिकोप्टरको दुर्घटनाबारे कारण पत्ता लगाउन प्राविधिकसहितको टोली गठन भएको छ । अहिले हेलिकोप्टर डोरीले बाँधेको अवस्थामा अस्पतालको छतमा राखिएको छ ।’ उनले अध्ययन समितिको प्रतिवेदनका आधारमा अरु काम अघि बढाउने बताए ।
दोलखाबाट बिरामी लिएर आएको हेलिकोप्टरले ग्राण्डी अस्पतालमा आएर बिरामीको असफल अवतरण गरी त्रिभुवन विमानस्थल फर्किएको थियो । इन्धन भरेर पुनः चितवनमा बिरामी लिन जानेक्रममा चिकित्सकलाई लिन अस्पताल पुगेको हेलिकोप्टर दुर्घटनामा परेको थियो ।
हेलिकोप्टरका चालक हरेराम थापा दुर्घटनाग्रस्त हेलिकोप्टरबाट सकुशल बाहिर निस्किएका थिए ।
दुर्घटनामा परेको हेलिकोप्टरको पंखा पूर्ण रुपमा क्षतिग्रस्त भएको छ । अन्य भागको अवस्था अध्ययन टोलीले पत्ता लगाउने महाप्रवन्कधक थापाले बताए ।
प्रकाशित: Dec 31, 2017| 18:23 आइतबार, पुस १६, २०७४