प्रा. मिश्रद्वारा पुरस्कार बापतको २ लाख दान

काठमाडौं- ‘नेपाल प्रज्ञा सामाजिक शास्त्र/संस्कृति/दर्शनशास्त्र पुरस्कार’द्वारा सम्मानित प्रा डा वीरेन्द्रप्रसाद मिश्रले पुरस्कारबापत आफूले पाएको दुई लाख रकम दर्शनशास्त्र विषयको अध्ययन-अनुसन्धानलाई थप प्रभावकारी तुल्याउन सहयोग पुर्‍याउन दान दिएका छन्।

प्रा. मिश्रको सो सहयोग रकमलाई उपयोग गर्दै नेपाल प्रज्ञा–प्रतिष्ठानले ‘दर्शनशास्त्र प्रवद्र्धन कोष’ स्थापना गरेको छ। दर्शनशास्त्रको अध्ययन-अनुसन्धानलाई अझै व्यवस्थित ढङ्गले अगाडि बढाउने उद्देश्यले कोष स्थापना भएको जनाइएको छ।

प्रतिष्ठानका सदस्य सचिव एवं दर्शनशास्त्र विभागका प्रमुख प्रा जगतप्रसाद उपाध्यायले डा मिश्रले दिएको उक्त रकमलाई बीज पूँजीका रूपमा जम्मा गरी रु तीन लाख थप गरेर रु पाँच लाखको ‘दर्शनशास्त्र प्रवद्र्धन कोष’ स्थापना गर्ने निर्णय गरिएको जानकारी दिए।