धादिङ-पत्रकार तथा साहित्यकार केशव दुवाडीको बालकथा संग्रह जुँगे झाँक्रीको भूत सार्वजनिक भएको छ । धादिङवेसीमा भएको एक कार्यक्रममा दुवाडीको कथा संग्रहको विमोचन भएको हो ।
जिल्ला समन्वय समिति धादिङका प्रमुख जगन्नाथ नेपाल र प्रमुख जिल्ला अधिकारी भागिरथ पाण्डेले कथासंग्रहको संयुक्त रुपमा विमोचन गरे ।
नौ कथा समावेश भएको बालकथा संग्रह 'जुँगे झाँक्रीको भूत'का विषयमा टिप्पणी गर्दै धादिङका अग्रज साहित्यकार बद्रीप्रसाद दाहालले कथाबाट सामाजिक सन्देशका साथसाथै भरपुर मनोरञ्जन पाउन सकिने बताए ।
छोटो समयमा प्रकाशित कृतिका बारेमा टिप्पणि गर्नु ज्यादै जटिल काम भएको भन्दै दाहालले कथा सरल, छोटो र मिठो भएको बताए ।
कथाकार केशव दुवाडीले बालअधिकार र संरक्षणको क्षेत्रमा काम गर्ने क्रममा बाल साहित्यप्रति पनि रुची बढ्दै गएकाले बढेको रुची अनुसार लेखिएका कथाको समग्ररुप नै जुँगे झाँकीको भूत रहेको बताए।
प्रकाशित: Dec 31, 2017| 18:23 आइतबार, पुस १६, २०७४