काठमाडौं- नेकपा एमालेको असन्तुष्ट पक्षको नेतृत्व गरिरहेका नेता माधवकुमार नेपालले आफू निकट केन्द्रीय कमिटीको बैठक बोलाएका छन्। बिहान ११ बजे शंखमुलस्थित क्वालिटी ब्यान्केट पार्टी प्यालेसमा केन्द्रीय कमिटी बैठक बोलाइएको हो।
बुधबार नै बैठक बोलाइएको भए पनि आवश्यक तयारी नपुगेको र उपत्यका बाहिरका केन्द्रीय सदस्य आउन समय लाग्ने भन्दै आजको लागि सारिएको थियो। आज बस्ने केन्द्रीय कमिटी बैठकमा पछिल्लो राजनीति घटनाक्रम र पार्टी एकतामा भइरहेको प्रयासलगायत अब कसरी अगाडि जाने भन्ने विषयमा नै छलफल हुने केन्द्रीय सदस्य जगन्नाथ खतिवडाले जानकारी दिए।
सरकारमा सहभागी हुने नहुने वा एकतामा कसरी जाने भन्ने विषयमा आफू निकट स्थायी कमिटी सदस्यसित छलफल गरेका नेता नेपालले आज केन्द्रीय कमिटीका सदस्यसित पनि छलफल गर्न लागेका हुन्।
नेपाल समूह भित्र पनि पछिल्लो समय दोस्रो र तेस्रो पुस्ताको धारणा फरक हुँदै आएको छ। दोस्रो पुस्ता १० बुंदेलाई आधार मानेर जानुपर्नेमा देखिएको छ भने तेस्रो पुस्ताका नेताहरूओलीलाई अध्यक्ष मानेर एकता नहुने बताउँदै आएका छन्।
यसैबीच नेकपा एमालेले विज्ञप्ति जारी गर्दै पार्टीको आज कुनै केन्द्रीय कमिटी बैठक नरहेको जनाएको छ। कार्यालय सचिव शेर बहादुर तामाङले विज्ञप्ति जारी गर्दै एमाले केन्द्रिय कमिटीका नाममा बैठक बोलाइएको सुन्नमा आएको भन्दै पार्टीको गम्भीर ध्यानाकर्षण भएको बताएका छन्।
`पटक-पटक एमालेको नामबाट अनधिकृत गतिविधि गर्ने र सो गतिविधिमा सरिक हुने विषय संविधान, प्रचलित कानुन र पार्टीको विधान विपरीत हुने भएकाले सो गतिविधिमा नलाग्न पार्टी कार्यकर्ता अपिल गर्दछ,´ तामाङले जारी गरेको विज्ञप्तिमा भनिएको छ।